Ivanov i ikë debatit në Kuvend, ku kërkohet përgjegjësi nga ai

Ivanov sot nuk është paraqitur në seancë plenare të Kuvendit, ku po debatohet për përgjegjësinë e tij politike- impiçment, raporton Portalb.

Deputeti dhe kryetari i Lidhjes Demokratike, Pavle Trajanov ka kërkuar që në Kuvend të paraqitet edhe vet presidenti Gjorge Ivanov, derisa po debatohet për përgjegjësinë e tij politike.

“Do të ishte mirë që presidenti të marrë pjesë në debat. Nëse duam të kemi debat kualitativ, prezenca e presidentit është e domosdoshme”, tha Trajanov.

Në ndërkohë kryeparlamentari Trajko Veljanovski ka kujtuar deputetin Trajanov se Kuvendi ka dërguar ftesë deri te institucioni i presidentit, por që vendimi për të marr apo jo pjesë është individual.

Të njëjtën e ka përsëritur edhe deputeti i VMRO-DPMNE-së Ilija Dimovski. “Nuk është i obliguar presidenti që të marrë pjesë në seancë. Përgjegjësia e tij është para qytetarëve dhe Kuvendit. Megjithatë u vërtetua se ai nuk ka shkelur Kushtetutën”, potencoi ai.

Deputetja e LSDM-së Renata Deskoska, njëra prej iniciuesve të impiçmentit, tha se Ivanov me heshtje dhe mosparaqitjen e tij në Kuvend pranoi fajin.

“Ivanov me tërheqjen e vendimit e pranoi fajin. Me tërheqjen e vendimit nuk mund të amnistohet Ivanov nga përgjegjësia. Kuvendi është sot para testit të Kushtetutës dhe qytetarëve. Shkelja e Kushtetutës është shkelje e vullnetit të qytetarëve. Ivanov pengoi punën e Prokurorisë Speciale Publike. Ai me heshtje dhe mosparaqitjen e tij në Kuvend pranoi fajin. Ivanov me tërheqjen e vendimit e pranoi fajin”, theksoi Deskoska.

Në mbrojtje të presidentit Gjorge Ivanov doli edhe Zoran Ilievski nga VMRO-DPMNE, i cili njëherit ishte edhe kryetar i Komisionit për vlerësimin e propozimit për përgjegjësi politike të Ivanovit.

“Komisioni solli vlerësim se impiçmenti nuk është i bazuar. Ivanov nuk ka shkelur Kushtetutën dhe ligjin. Për të pasur përgjegjësi politike duhet të shkelet Kushtetuta. Ne vlerësojmë se Kushtetuta nuk është shkelur”, deklaroi Ilievski.

Për deputetin e BDI-së Rafis Aliti, është akt moral i presidentit të jep dorëheqje. “E them këtë sepse ka dëmtuar sistemin juridik të vendit, ka shkelur Kushtetutën. Ka prishur imazhin e vendit. Reagimet e qendrave botërore ishin të qarta. Ivanov shkeli mbi drejtësinë në Maqedoni”, tha Rafis Aliti.