19 konkluzat e Këshillit të përgjithshëm të BDI-së
Këshilli i përgjithshëm i BDI-së ka miratuar konkluza pas mbajtjes së mbledhjes së sotme, ku është konstatuar vazhdimi i dialogut mes partive politike me ndërmjetësim ndërkombëtar për zbatimin e plotë të obligimeve që rrjedhin nga Marrëveshja e Shkupit është i domosdoshëm dhe pa alternativë.
“Ftojmë të gjitha subjektet politike në vend të veprojnë me përgjegjshmëri në periudhën para nesh në mënyrë që sa më shpejt të përmbyllen edhe çështjet e mbetura që rrjedhin nga Marrëveshja e Shkupit për të mundësuar mbajtje të zgjedhjeve të besueshme, fer dhe demokratike, në përputhje me pritjet e komunitetit ndërkombëtar. Këshilli i Përgjithshëm i Bashkimit Demokratik për Integrim kërkon nga institucionet kompetente të sundimit të ligjit që urgjentisht të ndërmarrin të gjitha masat për ta zbardhur deri në fund rastin “Fabrika e Aferave” dhe të nxjerrin para organeve të drejtësisë porositësit dhe realizuesit e shpifjeve dhe aferave të fabrikuara”, thuhet mes tjerash në konkluzat e Këshillit të përgjithshëm të BDI-së, njofton Aktuale.mk.
Konkluzat e KP të BDI-së
Konkluza e miratuar në mbledhjen e Këshillit të Përgjithshëm të BDI-së të mbajtur me 30 janar 2016:
- Këshilli i Përgjithshëm i Bashkimit Demokratik për Integrim konstaton se vazhdimi i dialogut në mes partive politike me ndërmjetësim ndërkombëtar për zbatimin e plotë të obligimeve që rrjedhin nga Marrëveshja e Shkupit e arritur me 2 qershor 2015 dhe e plotësuar më 15 korrik 2015 është i domosdoshëm dhe pa alternativë.
- Këshilli i Përgjithshëm i Bashkimit Demokratik për Integrim vlerëson që shtyllat kryesore nga Marrëveshja e Shkupit janë zbatuar në masë të konsiderueshme
- Ftojmë të gjitha subjektet politike në vend të veprojnë me përgjegjshmëri në periudhën para nesh në mënyrë që sa më shpejt të përmbyllen edhe çështjet e mbetura që rrjedhin nga Marrëveshja e Shkupit për të mundësuar mbajtje të zgjedhjeve të besueshme, fer dhe demokratike, në përputhje me pritjet e komunitetit ndërkombëtar.
- Bashkimi Demokratik për Integrim mbetet tërësisht i përkushtuar për të vijuar realizimin e Planit Aksional që përfshin rekomandimet urgjente të Komisionit Evropian, rekomandimet e Pribesë, rekomandimet e Dialogut të Lartë Paraqasës ku bën pjesë dhe analiza e zbatimit të Marrëveshjes Paqësore të Ohrit.
- Kontributi për një proces të besueshëm dhe atmosferë pozitive është i domosdoshëm për organizimin e zgjedhjeve të lira dhe demokratike më 24 prill 2016 të cilat duhet të rezultojnë me krijimin e Qeverisë stabile dhe të qëndrueshme që të ketë mundësi ndërmjet tjerash të përballet me integrimin EuroAtlantik, çështjen e emrit, marrëdhëniet ndërfqinjësore, marrëdhëniet ndëretnike, pritshmëritë dhe rekomandimin e kushtëzuar nga Komisioni Evropian, samitin e NATOsë në Korrik si dhe krizën me refugjatët nga Lindja e Mesme.
- BDI do të angazhohet me të gjitha kapacitetet e saja, që çdo pjesëmarrësi në zgjedhje t`i mundësohet garë e drejtë dhe e barabartë, si dhe garanton përkushtim maksimal për t’i siguruar çdo qytetari dhe subjekti realizim të të drejtave zgjedhore.
- Këshilli i Përgjithshëm i Bashkimit Demokratik për Integrim kërkon nga institucionet kompetente të sundimit të ligjit që urgjentisht të ndërmarrin të gjitha masat për ta zbardhur deri në fund rastin “Fabrika e Aferave” dhe të nxjerrin para organeve të drejtësisë porositësit dhe realizuesit e shpifjeve dhe aferave të fabrikuara.
- Këshilli i Përgjithshëm i Bashkimit Demokratik për Integrim ju bën apel anëtarëve të partisë dhe të gjithë qytetarëve që të mos bien pre e shpifjeve të cilat e kontaminojnë opinionin dhe i fton që në periudhën që vjen të janë edhe më të vëmendshëm ndaj këtyre shpifjeve dhe montimeve që kanë për qëllim të njollosin personalitetet e BDI-së dhe të fusin përçarje në mes anëtarëve të partisë.
- Këshilli i Përgjithshëm i Bashkimit Demokratik për Integrim obligon SHQZ që në afat sa më të shkurt të formojë të gjitha strukturat zgjedhore në të gjitha nivelet dhe të përgatis platformën dhe strategjinë e zgjedhjeve
- Këshilli i Përgjithshëm i Bashkimit Demokratik për Integrim obligon SHQZ që deri në moomentin e miratimit të Vendimit të Kryesisë së Këshillit të Përgjithshëm për pjesëmarrje në zgjedhjet e parakohshme të përpilojë propozim – programin zgjedhor, të bazuar në Programin e miratuar në Kongresin e III-të dhe Rezolutës së miratuar në Kongresin Tematik bashkë me kërkesat e qytetarëve, si dhe të njejtin ta dorëzon për shqyrtim dhe miratim para Kryesisë së Këshillit të Përgjithshëm të Bashkimit Demokratik për Integrim.
- Këshilli i Përgjithshëm i Bashkimit Demokratik për Integrim obligon të gjitha strukturat e BDI-së që në mënyrë aktive të kyçen në Shtabet zgjedhore, në llogaridhënien para qytetarëve, në mbarëvajtjen e proceseve që lidhen me zgjedhjet dhe të mos keqpërdorin resurset shtetërore për qëllime të fushatës zgjedhore.
- Bashkimi Demokratik për Integrim fton të gjitha grupet e interesit si dhe qytetarët që të bëhen pjesë e përpilimit të programit zgjedhor nëpërmjet të shkëmbimit të ideve dhe propozimeve me Shtabin Qëndror Zgjedhor ose nëpërmjet të kontaktit të drejtpërdrejt me strukturën më të afërt.
- Bashkimi Demokratik për Integrim siguron qytetarët që do të vazhdojë të jetë zëri i tyre, si dhe artikuluesi e realizuesi i kërkesave të tyre në institucionet e vendit, gjithmonë duke e vendosur interesin e përgjithshëm para atij partiak.
- Bashkimi Demokratik për Integrim fton të gjitha subjektet politike që të angazhohen për fushatë të civilizuar dhe shembullore zgjedhore si dhe të përmbahen nga gjuha e urrejtjes, shpifjeve dhe nxitjes së jotolerancës ndërpartiake.
- Bashkimi Demokratik për Integrim fton partitë e opozitare dhe të reja shqiptare që të unifikohen në mënyrë që mos të kontribuojnë në përçarjen e votës shqiptare dhe rrjedhimisht të shkaktojnë humbjen e mandateve shqiptare në përbërjen e re të Kuvendit të Maqedonisë.
- Bashkimi Demokratik për Integrim ofron partneritet për mediat në përpjekjet për të reformuar fushën mediatike dhe i fton që të kontribuojnë në krijimin e kushteve të barabarta garuese për të gjitha subjektet konkuruese.
- Bashkimi Demokratik për Integrim mbështet punën e Komisionit Shtetëror Zgjedhor dhe zotohet për të dhënë kontribut në drejtim të zbatimit të Metodologjisë për pastrimin e listës zgjedhore dhe mbarëvajtjes së procesit zgjedhor.
Bashkimi Demokratik për Integrim gjithashtu fton qytetarët që të kyçen në mënyrë aktive në pastrimin e listës zgjedhore si dhe të kontribuojnë në mbarëvajtjen e zgjedhjeve duke denoncuar çdo parregullësi eventuale.
- Bashkimi Demokratik për Integrim mbështet punën e paanshme dhe transparente të zyrës së Prokurorës Speciale në përputhje me kompetencat ligjore dhe shpreh pritshmëri që kjo Prokurori të merr në kompetencat e veta rastet kontestuese dhe të ndjeshme.