Pegida mbledh “aleatët”, valë protestash antiemigrantë në BE

Të shtunën, në ditën kur Angela Merkel përcillte një mesazh të fortë të saj mbi antisemitizmin, përfaqësues të lëvizjes gjermane kundër emigracionit, “Pegida”, zhvilluan në Çeki një takim me aleatët e tyre europianë.

Grupet, nga shtete të kontinentit të vjetër që ndajnë mes tyre të njëjtën mendësi, firmosën një deklaratë, ku bien dakord për protesta të përbashkëta në muajin shkurt. Kryefjala e takimit të tyre ishte paralajmërimi ndaj atij, që e shohin si rrezikun më të madh të momentit: pushtimin islamik të Europës.

Një nga aktivistet më të zëshme të “Pegida”-s, Tatjana Festerling kritikoi politikat e Berlinit e në konferencën e mbajtur në Roztoky, pranë kryeqytetit çek, Pragë, e cilësoi Gjermaninë “rrëfenjën e një paralajmërmi për BE-në, shembullin që u tregon vendeve të tjera anëtare se çfarë mund të shkojë keq, kur një shtet iu hap emigrantëve dyert e tij.

“Kancelarja Merkel po shton shumë numrin e meshkujve në Gjermani. Pjesa më e madhe e atyre 1,1 milionë emigrantëve që mbërritën vitin e kaluar ishin burra e djem”, tha Tatjana Festerling, aktiviste e “Pegida”-s.

Mikpritësja e takimit të Roztokit ishte partia çeke Usvit (Agimi) si dhe një lektor universitar, Martin Konvicka, drejtues i grupimit lokal të ekstremit të djathtë, blloku kundër islamit.

Organizatat e antiemigracionit nga shtete të ndryshme të BE-së vendosën zhvillimin e një vale protestash më 6 shkurt, duke e cilësuar këtë datë si “ditën e patriotëve europianë”. Tubimet do të mbahen në fortesën e “Pegida”-s në Dresden, në Pragë, Varshavë e qytete të tjera europiane.

“Mesazhi ynë është i thjeshtë: europianët nuk do ta dorëzojnë Europën”, tha Martin Konvicka, udhëheqës i bllokut antiIslam, Çeki.

Në Gjermani, “Pegida” fitoi popullaritet me fillimin e krizës së refugjatëve në 2014-n, ndërsa sulmet e natës së Vitit të Ri në Këln i dhanë një tjetër hov përkrahjes për lëvizjen që ushqen ndjenjat kundër të huajve në vend.