“Sherr” më i madh është keqinformimi
[Recension: “Plas sherri në UEJL, shkarkohet prorektori Ismail Zendeli”]
Produkti gazetaresk që po e recensojmë flet për një “sherr” në Universitetin e Evropës Jug-Lindore. Megjithatë, “sherri më i madh mund të plasë” kur gazetari përfundimet e tij nuk i bazon në asnjë argument.
Linku deri te artikulli origjinal: “Plas sherri në UEJL, shkarkohet prorektori Ismail Zendeli”
Data dhe koha e publikimit: 21.12.2015
Data e recensionit: 08.12.2016
Recensues: Xhenis Sulimani
“Probleme të mëdha financiare”, “Humbje e imazhit”, “Kualiteti i mësimdhënies dhe menaxhimit” janë vlerësime që janë bërë për Universitetin e Evropës Jug-Lindore por pa dhënë shumë argumente çka mund të çojë në konkluzione të pavërteta tel lexuesit. Humbja e cilësisë së një Universiteti nuk është gjë të cilën gazetari e kalon me një fjali, sikur të ishte e parëndësishme. Do të duheshin disa burime dhe verifikime që do t’i paraprinin këtij teksti, të mbushura me argumente dhe përfundime bindëse që vërtetonin për akuzat e ngritura.
“Pas humbjes së imazhit dhe rënies së cilësisë në UEJL, ka plasur edhe sherri brenda stafit akademik. Rektori i UEJL-së Zamir Dika ka shkarkuar prorektorin Ismail Zendeli për arsye ende të panjohuara, njofton portali TetovaSot”.
Nga ana tjetër, nëse supozojmë se gazetari ka bërë kërkimin paraprak dhe ka ardhur në konkluzionet që i shpalos, do të duhej në tektst të kishte të gjitha palët. Në këtë produkt nuk ka asnjë prononcim zyrtar nga UEJL, por as nga protagonisti që paraqitet në tekst. Në vend që gazetari ta sqarojë ngajrjen e mundshme të shkarkimit duke u munduar të ketë në tekst së paku dy burime, sipas standardeve profesionale gazetareske, ai edhe më tepër thellon hamendjet duke përhapur dilema rreth shkarkimit.
“Një prej varianteve që përfolët është edhe ai i shkrirjes me USHT-në që në të ardhmen edhe mund të ndodh. Edhe më parë në opinion është folur për këtë mundësi, por pas këtyre vështirësive që janë reflektuar edhe në rangimet e këtij universiteti, ky variant mund të jetë i pritur”
Misioni i gazetarit është kristalizimi para opinionit i ngjarjeve me interes të përgjithshëm. Pjesë e misioni është edhe sqarimi i dilemave të mundshëm për tema të caktuara. Ai në asnjë mënyrë nuk duhet të përfundojë produktin gazetaresk duke e ngritur dilema të pabaza, sepse në këtë mënyrë del jashtë standardeve profesionale, kështu që në vend të sqaruesit të ngjarjeve bëhet spekulues.
Në Kodin Etik Gazetaresk thuhet se, nëse informata nuk mund të vërtetohet, ose bëhet fjalë për supozim, përkatësisht spekulim, kjo duhet të thuhet dhe të publikohet. Saktësia e informatës duhet të provohet sa më shumë të jetë e mundur.
