Një javë më herët, Opozita nis me thirrjet për protestë

Lëvizja Vetëvendosje, Aleanca për Ardhmërinë e Kosovës dhe Nisma për Kosovën ka nisur thirrjet për protestën e 9 janarit.
Sikur edhe herëve të tjera, rrjeti social Facebook është përdorur për të ftuar qytetarët që t’i bashkohen në protestën “për dorëheqjen e Qeverisë”.

“Prej të gjitha qyteteve e fshatrave të Kosovës, të shtunën me datën 9 janar, në orën 14:00 do të mblidhemi në Prishtinë. Do të protestojmë e do të kërkojmë largimin e kësaj qeverie antikushtetuese. Njëzëri do të dalim për shtet dhe sovranitet. Së bashku do të kërkojmë demokraci. Masivisht do t’i themi jo marrëveshjes me Serbinë e cila u vërtetua se e shkel kushtetutën në 23 pika si dhe demarkacionit me Malin e Zi që Kosovës ia merr mbi 8 mijë hektarë tokë”, thuhet në thirrjen e opozitës.

“Organizimi ka nisur. Përcilleni lajmërimin edhe te fqinjët e familjarët tuaj. Të gjithë së bashku do të takohemi tek Biblioteka Kombëtare në Prishtinë, me 9 janar, ora 14:00”, thuhet më tej aty.