Tymnaja e universitetit të Shkupit pjesë e fushatës elektorale!

Tashmë nuk ka asnjë fije dyshimi se Ali Ahmeti dhe DUI, janë përgjegjës për ngecjet të çështjeve që kanë të bëjnë me të drejtat kombëtare të shqiptarëve. Ata i kanë anashkaluar përgjegjësitë dhe janë treguar të papërgjegjshëm në fushat ku është në pyetje përdorimi i gjuhës shqipe dhe të tjera çështje si kjo. Kohët e fundit ata kanë heshtur edhe për ndotjen e ambientit që shkaktojnë oxhaqet e tymosura e të pa-filtruara të Jugohromit për qytetarët e rrethit të Tetovës dhe më gjerë.

DUI dhe qeveria e koalicionit me në krye kryeministrin Gruevski, kanë gjetur mënyra të tjera të tërheqjes së vëmendjes së opinionit publik shqiptar nga problemet e përditshmërisë .Me sihariqin e ri për tregun mediatik ata shpallën krijimin e një Universiteti të ri në Shkup ( sipas DUI-t Universitet i dytë shqiptar).Në fakt, ky Universitet nuk është institucion i dytë shqiptar që do të mësojnë studentët tanë në gjuhën shqipe por  Institucion i lartë multietnik për bashkësitë më të mëdha etnike të Maqedonisë dhe do mësimi do të zhvillohet në tri gjuhë siç janë; maqedonisht ,shqip dhe anglisht.

Universitet i cili do të jetë multikultural dhe multilingual ,një vazhdim i “vëllazërim – bashkimit ” të paraleleve të përziera të dikurshme në shkollat e mesme .Është parashikuar se do të ndërpriten shtatë programe mësimore nga USHT-ja për t’i zëvendësuar në Universitetin e Shkupit. Kjo do të thotë se nga krahët dhe degët e USHT-së të këputen disa pjesë dhe këto t’i shartohen Universitetit të ri të “vëllazërim -bashkimit” në Shkup.

I ftuar në “Rruga drejt… ” në Alsat-M, lideri i integristëve shqiptar Ali Ahmeti, nuk sqaroi drejt se cila është gjuha e punës së atij Universiteti. Ai gjatë pyetjeve të parashtruara u mundua të mbroj qëndrimet e tij dhe të DUI-t në qeveri e koalicionit si qëndrime të drejta në shërbim të qytetarëve .

Realiteti i sotëm në Maqedoni hedh poshtë vlerësimet e z.Ahmeti për qëndrime të drejta dhe arritje në realizimin e të drejtave të shqiptarëve gjatë mandatit të tij në qeveritë e koalicionit. Këto janë gurët e fundit të mashtrimit elektoral që po përdor Ali Ahmeti dhe partia e tij DUI, për gjoja një Universitet të dytë shqiptar në Maqedoni.

Shqiptarët e Maqedonisë duhet t’i thonë Jo këtij Universiteti sepse nuk është i shqiptarëve dhe për shqiptarët por i DUI-t dhe i Gruevskit.