Senatori amerikan McCain vizitë në Ukrainë: Mbështesim qëndrimet e autoriteteve zyrtare

Senatori amerikan, John McCain në kuadër të vizitës zyrtare në Ukrainë vizitoi qytetin jugor të Odesës, ku takoi presidentin ukrainas, Petro Poroshenko, ndërsa me këtë rast theksoi se SHBA-të nuk e njohin qeverinë e vetëshpallur separatiste në lindje të vendit, por se mbështesin qëndrimet e autoriteteve zyrtare në vend, raporton Anadolu Agency (AA).

Zyra për marrëdhënie me publikun e presidentit ukrainas njoftoi se Poroshenko është takuar me senatorin dhe shefin e Komitetit të Senatit për Forcat e Armatosura, McCain dhe falënderoi për mbështetjen e Senatit amerikan ndaj Ukrainës e cila gjendet përball politikës agresive të Rusisë.

Duke i shprehur falënderime McCain-it për kontributin që jep lidhur me procesin e ndihmës amerikane për Ukrainën në armatosje, Poroshenko bashkëfolësin e informoi për proceset e reformave dhe implementimin e marrëveshjes paqësore të Minskut.

“Nuk dyshoj se ukrainasit deri në fund do të luftojnë për vendin e tyre. Dua t’u përcjell se shumë politikanë amerikanë do të vazhdojnë të përpiqen maksimalisht për të ndihmuar Ukrainën”, tha McCain gjatë takimit me presidentin ukrainas.