AUV: Uji për pije në Strugë është i ndotur, Proaqua demanton

Uji për pije në Strugë është i ndaluar. Agjencioni për Ushqim dhe Veterinari, dje ka sjellë vendim për ndalesë të përdorimit të ujit nga ujësjellësi i Strugës, sepse në të është gjetur “Esherija koli” dhe tjera bakterie me prejardhje fekale.

Nga ndërmarrja publike “Proaqua”, për Telma janë deklaruar se shkaku i ndotjes, është se ndërmarrja ka disa ditë që nuk ka pasur mjaftueshëm klor për ta pastruar ujin, për këtë arsye uji është kloruar me masë më të vogël të klorit, e cila nuk i ka shkatërruar të gjitha bakteriet patogjene.

Këtë informatë, mediumet e kanë marrë vesh nga burimet e veta, nuk është lajmëruar publikisht, ose asnjë institucion nuk i ka lajmëruar banorët e Strugës për rrezikun e ujit nga ujësjellësi.

Nga ana tjetër, është publikuar edhe një deklaratë tjetër e dhënë nga “Proakua”, ku thonë se uji është i pastër dhe i sigurt për pije.

“Ka ndoshta një dezinformim të qëllimshëm siç ishte rasti edhe i shkrimeve se uji në disa vende të Ballkanit nuk është i preferuar për pije. Ka pasur një problematikë me ujin e disa fshatrave të Strugës, sisteme të cilat nuk i menaxhon “Proaqua”, ndërsa uji në qytet i plotëson të gjitha standardet. Me keqardhje konstatojmë se këto informacione janë të vjetruara dhe jo të bazuara “, thonë “Proaqua”, në një deklaratë për Drini.mk.