Informacioni shtesë është i nevojshëm për lajmin
Një artikull profesional gazetaresk, përveç të dhënave aktuale që i përmban në vete, ai duhet të posedojë edhe informacionin shtesë, apo i njohur si “background” në gjuhën gazetareske. Teksti që po recensojmë, përveç se është i zbrazët në përmbajtje, në fund nuk e përkujton lexuesin rreth çështjes të cilën e parashtron në titull. Si i tillë, përbëhet vetëm nga deklaratat e Kryeministrit aktual Nikolla Gruevski.
“Komuna investon për ndërtimin e rrjetit ujësjellës, rrugët veç më janë tamponuar, EVN në faza lëshon energji elektrike, kështu që punët në zonë zhvillohem mirë”.
Linku deri te artikulli origjinal: Recension: Në Petrovec edhe një zonë industriale, ku mbeti ajo e Tetovës?
Data dhe koha e publikimit: 15.08.2015
Data e recensionit: 17.08.2015
Recensues: Adrian Kerimi
Përzgjedhja e deklaratave të folësve është një nga elemente më të rëndësishëm gjatë raportimit. Gazetari ka zgjedhur një deklaratë të qëlluar të Gruevskit, por mungesa e informacionit shtesë pas saj, bën që teksti të përfundojë duke krijuar hamendje tek lexuesit.
“Në fazën përfundimtare është fabrika e re e firmës Maqedoni-Austri “Kvenberger”. Paralelisht me to investimi italian gjegjësisht spitali i ri i Euroitalia deri në vitin e ri pritet pjesërisht të fillojë me punë. Kjo do të mundësojë punësime të reja, ndërsa spitali pritet të sjellë pajisje moderne dhe cilësi shtesë në trajtimin shëndetësor në Maqedoni dhe në vitet e ardhshme të hapë rreth 250 vende pune”.
“Kryeministri informoi se deri tani në komunën Petrovec janë realizuar shumë projekte”, ky është rreshti i vetëm i cili sipas gazetarit ka mjaftuar për informacion shtesë. Do të ishte i nevojshëm numri i përgjithshëm i Zonave Industriale në Maqedoni, ndarja e projekteve për to dhe përqendrimi i investitorëve nëpër zona. Në fakt tekstit do t’i shkonte për shtati edhe çështja e Zonës Industriale në Tetovë, duke bërë krahasime dhe analiza që do të sillnin një tabllo më të gjerë të çështjes në fjalë. Por gazetari këtë çështje e ka mbyllur vetëm në titull, duke mos informuar me informacione shtesë lexuesin. Në tekst mungon edhe pala tjetër apo investitorët e huaj dhe qëndrimet e tyre lidhur me investimet dhe sigurinë e investimeve të tyre në Maqedoni.
