Rikthehen vizat për në Gjermani? Kjo nuk është e vërtetë!
Ky është titulli goditës i lajmit për të cilin menjëherë, që në fillim të recensionit, duhet të themi se nuk është i vërtetë. Cilët janë motivet dhe pse është dashur të publikohet një lajm i këtillë shqetësues dhe pa përmbajtje të cilin më pas e kanë përcjellë dhjetëra medie të tjera, me të vërtetë nuk është e qartë, vetëm nëse dikush ka dashur qëllimisht ta kthejë vëmendjen e qytetarëve nga problemet e shumta dhe njëherit t’i frikësojë?
Linku deri te artikulli origjinal: Rikthehen vizat për në Gjermani: Kthehen vizat për vendet e Ballkanit
Data dhe koha e publikimit: 29.07.2015
Data e recensionit: 31.07.2015
Recensues: Aleksandar Pisarev
MOSKUPTIM I PROBLEMIT
Në pjesën hyrëse të lajmit shkruhet në kohën e tashme, duke shpjeguar se Gjermania praktikisht tashmë i ka kthyer përsëri vizat për qytetarët e Ballkanit perëndimor. Kjo nuk është e vërtetuar me asnjë fakt të vetëm, nuk ka burim të informacionit, ndërsa konstruksioni i fjalive në mënyrë taksative pretendon se në këtë shtet përsëri nuk mund të udhëtohet lirshëm.
“Nuk ka më udhëtim në Gjermani pa vizë. Gjermania do të ndërmarrë aktivitete të veçanta me qëllim që të ulet numri i kërkuesve të azilit nga vendet e Ballkanit, me sjellje të sërishme të regjimit të vizave për banorët e këtyre shteteve.”
Edhe njëherë do ta përsërisim se nuk është e vërtetë. Për ta vërtetuar “besueshmërinë” e shkrimit, artikulli, si burim, thirret në një publikim të “BBC”-së, ku theksi është vënë në problemin me azilantët, për të cilin më së shumti flet kryeministri i Bavarisë, por askund nuk përmendet se qytetarët e Ballkanit perëndimor nuk do të udhëtojnë më në Gjermani pa viza.
Përveç këtyre disa fjalive frikësuese në fillim të tekstit, përmbajtja e mëtejshme i referohet problemit me emigrantët. Lajmi kryesor, se nuk ka më udhëtim në Gjermani pa viza, humbet nga përmbajtja me çka i gjithë informacioni mbetet i pa përmbajtur deri në fund.
BERLINI ZYRTAR DEKLARON TË KUNDËRTËN
Edhe kodet vendore dhe ato ndërkombëtare, duke precizuar rolin e gazetarëve dhe të medieve, insistojnë në informim të saktë. Kodeksi i IFJ thotë:
Përkrah përshkrimit të saktë të fakteve gazetari duhet të jetë i aftë të parashikojë gabim të mundshëm dhe prandaj duhet të kontrollojë dhe të ri-kontrollojë faktet dhe informacioni që jep të jetë autentik dhe i saktë.
Pse e themi këtë? Problemet me azilantët në Gjermani janë të mëdha, posaçërisht në Bavari. Kryeministri i atjeshëm Horst Zihofer është një nga konspiruesit për rikthimin e regjimit të vizave, megjithatë ky nuk është qëndrimi zyrtar i Gjermanisë. Po të kërkohej vetëm pak në internet, do të gjendej intervista e fundit e Manfred Shmit, kryetar i Byrosë për migrime dhe refugjatë në Gjermani, i cili, në emër të Berlinit Zyrtar, pretendon diçka plotësisht të kundërt nga ajo të cilën e ka publikuar media.
“Mendoj se sjellja e vizave është me të vërtetë mjeti i fundit. Ne këtu, në tregun e punës, kemi një numër të konsiderueshëm të njerëzve të Ballkanit. Për momentin në Gjermani qëndrojnë rreth 700.000 qytetarë nga Serbia, Bosnja, Mali i Zi, Shqipëria dhe Kosova, të cilët kanë leje qëndrimi dhe këtu jetojnë dhe punojnë plotësisht në mënyrë legale. Kthimi i regjimit të vizave do të prekte edhe njerëzit e atij rajoni, të cilët legalisht vijnë në Gjermani dhe kjo nuk do të ishte e drejtë ndaj tyre.”
KODI I GAZETARËVE
Parimi themelor i sjelljes së gazetarëve, i cili rrjedh nga Kodi, është respektimi i të vërtetës dhe të drejtës të publikut për një informim në mënyrë objektive dhe të vërtetë. Në këtë rast kjo nuk është respektuar, si dhe neni 1 i Kodeksit i cili thotë:
Gazetari duhet të publikojë informata të sakta, të kontrolluara dhe nuk do të fshehë të dhëna thelbësore e as të falsifikojë dokumente.
Për ta përmirësuar gabimin, gazetari duhet të sillet në pajtim me nenin 3 të Kodeksit.
Gazetari do të kërkojë të sigurohet publikim i korrigjimit dhe përgjigjes në rast se vërtetohet pasaktësi e informatës.
