Diplomacia maqedonase shfrytëzon miqtë e Ahmetit në Evropë
Vlerësimet e qarqeve politike maqedonase shtrojnë dilemën, nëse vizitat e shpeshta diplomatike të Ali Ahmetit për një çështje kaq delikatë siç është emri, janë të sinkronizuara me qeverinë.
Analisti Naser Ziberi i vlerëson lartë vizitat diplomatike të Ali Ahmetit për cështjen e emrit, veçanërisht për sensibilizimin e opinionit ndërkombëtarë se jo të gjithë janë të të njëjtit mendim si Gruevski.
“Aktiviteti ndërkombëtarë i zotëri Ahmeti për gjetjen e një zgjidhje për çështjen e emrit dhe proceseve intriguese te Maqedonisë, është për tu përshëndetur pasi që të paktën opinionit ndërkombëtarë i bëhet me dije se e gjithë politika e Maqedonisë nuk mendon si mendon Gruevski , respektivisht, se ka politika të cilët duan të gjejnë një zgjidhje kompromisi”, thotë Naser Ziberi.
Sipas tij, politika shqiptare ka ndenjur e heshtur edhe me një farë mënyre është formuar një përshtypje se edhe shqiptarët janë të njëjtit mendim, por gjithsesi kjo nuk mjafton që të gjendet kompromisi. “Ahmeti me të njëjtën ritëm që është duke vepruar në skenën ndërkombëtare, duhet të bëj përpjekje edhe më të fuqishme brenda në Maqedoni , në rend të parë me partnerin e vet të koalicionit dhe fund të fundit, duhet të vendos një vijë të kuqe”, thotë Naser Ziberi.
LSDM-ja, thotë se, Ahmeti dëshiron të tregojë se partitë shqiptare nuk shërbejnë vetëm për çështje lokale por janë të barabartë me qeverinë dhe dëshirojnë që ti tregojnë qytetarëve, por edhe bashkësisë ndërkombëtare se janë të interesuar për çështjen e emrit.
“ Është e qartë se këtu nuk bëhet fjalë për vizita të rastësishme, por Gruevski e shtynë Ahmetin që të përcjellë qëndrimet se është i interesuar për zgjidhjen e çështjes së emrit, por njëkohësisht dëshiron të merr raport pozitiv nga Komisioni Evropian. Të mos harrojmë, ndoshta Ali Ahmeti nuk i di të gjitha letrat e Gruevskit, i cili mund ta ndryshojë qëndrimin se do zgjidhje për një sekondë”, thotë LSDM-ja.
Ish ambasadori i Maqedonisë në NATO, Nano Ruzhin thotë se me vizitat e tij për çështjen e emrit, Ali Ahmeti i ka dhënë shuplakë diplomacisë maqedonase. Këto vizita sipas tij, flasin qartë se ai ka raporte të mira me të gjithë dhe me këtë mund të stimulojë diplomacinë maqedonase.
“Ahmeti është i shoqëruar me kolegun e tij partiak ministrin Fatmir Besimi. Lideri I BDI-së është duke i shfrytëzuar mirë lidhjet e tij me miqtë evropian, kjo nuk është keq , por e keqja është se në këto takime të Ahmetit me diplomat të huaji nuk e dimë se për çfarë flasin”, thotë Nano Ruzhin.
Lidija Dimova nga Qendra maqedonase për Arsim evropian, thotë se aksioni i Ali Ahmetit është me interes, por i vonuar. Kjo sipas saj është njësojë sikur të behësh gati për në rrugë dhe duhet ti kesh gati valixhet, ndërsa Maqedonia niset në rrugë pa valixhe .