Procedura burokratike, investime të pakta nga mërgimtarët
Muajt e verës e karakterizojnë Maqedoninë me ardhjen e mërgimtarëve në vendlindjen e tyre. E tërë Maqedonia, e në veçanti Maqedonia perëndimore, paralizohet nga njerëz të shumtë, vetura luksoze, dyqane e kafene të stërmbushura. Realiteti që përballemi me ardhjen e emigrantëve është se rrugët janë të zëna në të katërt anët me vetura të parkuara keq (në mungesë të parkingjeve adekuate), kalimtarë që nuk respektojnë shenjat rrugore qoftë vijat e bardha apo sinjalizues rrugorë, fëmijë shqiptarë të rritur që flasin gjuhë të huaja e shumë fenomene tjera që i karakterizojnë mërgimtarët tonë.
Sipas raporteve lokale, ekonomia e vendit lulëzon kur emigrantët kthehen në Maqedoni. Por në çfarë projektesh investojnë emigrantët tonë që me dekada apo vite jetojnë në vendet perëndimore? Sa varet buxheti i Maqedonisë nga paratë e tyre? Përse nuk kemi investime konkrete në biznese nga emigrantët në Maqedoni , por jemi vetëm dëshmitarë të dasmave megalomane që ato investojnë?
Buxheti në varësi nga paratë e mërgimtarëve
Ekonomisti Visar Ademi , thotë për Inbox7 se buxheti i Maqedonisë varet shumë nga parat që i sjellin emigrantët tonë. Sipas tij janë transferimet ose remitancat që emigrantët i dërgojnë në vendlindje dhe që e ndihmojnë buxhetin tonë.
“Me paratë që ato sjellin në Maqedoni, harxhimet që ata i zhvillojnë këtu dhe investimet e tyre në patundshmëri (shtëpi dhe tokë) kontribojnë në zhvillimin ekonomik të këtij vendi”.
Ndërsa Bekim Imeri nga Banka Botërore në Shkup thotë që nuk mund të thuhet saktësisht se sa shumë apo në çfarë mënyre direkte paratë që sillen këtu e ndihmojnë stabilitetin dhe shkëmbimin e euros dhe denarit maqedonas.
“Askush nuk është marrë seriozisht me këtë çështje dhe nuk ka ndonjë hulumtim kredibil për këtë fenomen”.
“Dihet që bilanci pagesorë ndihmohet nga parat e mërgimatërve, sepse Maqedonia më shumë importon sesa eksporton. Por kjo quhet bilanc negativ tregtar që rezulton në bilanc negativë pagesor dhe ndikon në zvogëlimin e rezervave devizore”, thotë Bina.
Por Ademi është i mendimit që nuk është sekret nëse thuhet se mërgimtarët shqiptarë kontribojnë dikur rreth 50% të mbushjes së arkës dhe buxhetit të Maqedonisë.
Edhe pse mërgimtarët kontribojnë në zhvillimin ekonomik të Maqedonisë, paratë e tyre qarkullojnë nëpër projekte afatshkurtra dhe investimet në projektet afatgjate janë pothuajse zero.
Sipas Ademit disa faktorë ndikojnë që mërgimtarët nuk janë duke investuar në Maqedoni.Ai thotë që ka tre arsye konkrete për këtë dukuri.
“Arsyeja e parë është se mërgimtarët tonë nuk kanë besim në sistemin e drejtësisë dhe garantimit të pronës në Maqedoni (kur bëhet fjalë për investime ekonomike). Në një vend kur digjet gjithçka shqiptare, garancia e kapitalit tënd është në pikëpyetje.
E dyta, sepse mërgimtarët tonë ballafaqohen me procedura burokratike dhe korrupsion për të investuar në vendlindje. Edhe për këtë ka shumë shembuj mërgimtarësh që kanë ardhur dhe kanë ikur shpejt të ballafaquar me këtë realitet.
Mërgimtarët ballafaqohen me procedura burokratike
Dhe e treta ka të bëjë me trashëgiminë tonë kulturore. Shqiptarët gjithmonë investimet në patundshmëri i kanë konsideruar si më të sigurta, ndërsa aktivitetin ekonomik e kanë parë në vendet ku kanë punuar”.
Por për faktin që para të shumta harxhohen nga mërgimtarët për dasma megalomane dhe tradita tjera, dhe jo në plane konkrete për zhvillim ekonomik, Bekim Bina thotë që një gjë e tillë flet shumë për mentalitetin e mërgimtarëve dhe trevave tona.
“Një gjë e tillë bëhet thjesht për vlera të popullatës tonë.Thjesht janë paratë e tyre dhe i shpenzojnë sipas prioriteteve të tyre,” shprehet Bina.
” Janë pikërisht mërgimtarët ato që duhet të tregojnë se pse nuk investojnë në Maqedoni, sepse ne vetëm mund të japim supozime të ndryshme”.
Mërgimtari nga Struga (Z.M.) me vendbanim në SHBA , thotë për inbox7 se parat i shpenzojnë më së shumti në gëzime familjare si fejesa, martesa, synete etj.
“Nga këto më së shumti përfitojnë hotelet, studio për incizim, këngëtaret e kështu me radhë”.
” E dini tani më, që një dasmë e thjesht kushton diku te 15.000 euro dhe duke ftuar 300-400 persona”, thotë ai. Ai sqaroi se nuk mund të investojnë në projekte afatgjate , përshkak se është e vështirë të shpërngulen nga një vend ku ata tani më e kanë ndërtuar jeten e tyre dhe janë mësuar me sistemin e atjeshëm.
Bekim Bina shprehet që nuk është aq e lehtë shpërngulja në vendlindje kur ata janë mësuar me një sistem tjetër dhe në fakt një gjë e tillë mbase do të ishte e lehtë nëse sistemi ynë këtu do të funksiononte në rregull.
“Do të shpërnguleshin emigrantët tonë në vendlindje nëse ata do të gjykonin se ka ambient për biznes dhe shohin perspektivë”. /Inbox-7