Maqedonia rrezikon perspektivën evropiane

Nëse deri më 24 mars Nikolla Gruevski nuk pranon propozimin për marrëveshje politike me opozitën, atëherë Maqedonia do të marrë raport negativ nga BE, ndoshta edhe me marrjen e rekomandimit për fillimin e bisedimeve, ka theksuar nënkryetari i LSDM-së, Zoran Jovanovski, duke shtuar se të gjitha përgjegjësit janë drejtuar tek kryeministri Nikolla Gruevski. 

Jovanovski ka nënvizuar se tanimë është e qartë për të gjithë se opozita nuk bën lojë, me vendimin e qartë për bojkotimin e zgjedhjeve lokale. 

“Tani shtrohen dy çështje. Së pari, të shohim se për Gruevskin a është më i rëndësishëm interesi dhe ardhmëria e Maqedonisë apo interesat e tij personale dhe partiake. Së dyti, duke ditur tashmë efektin negativ të rrugës drejt NATO dhe BE për shkak të inateve të VMRO-DPMNE dhe mospranimin e ofertës së opozitës, tani do të shohim se si do të veprojë BDI, e cila thotë se prioritet kryesor është BE dhe NATO. Deri më 24 mars gjithçka do të dihet. Punët tashmë kanë dalur në sipërfaqe. Nuk ka më fshehje dhe maskime. A do të pranojë Gruevski propozimin e opozitës apo Maqedonia do të humbë pesë vite”, theksoi Jovanovski. 

Nënkryetari i LSDM-së ka rikujtuar se propozimi i opozitës është që të shtyhen zgjedhjet lokale për një muaj dhe të bëhen ndryshimet e kodit zgjedhor. /Portalb