Meta takon liderët opozitarë në Kosovë, sheh mundësi për zgjidhje

Kryetari i Kuvendit të Shqipërisë, Ilir Meta, ka përfunduar takimet me tre liderët e partive opozitare në Kosovë.

Të fundit që e ka takuar Meta është kryetari i Nismës për Kosovën, Fatmir Limaj, ndërsa para tij politikani nga Shqipëria është takuar edhe me Visar Ymerin e Ramush Haradinajn.

Pas takimit Limaj-Meta ata edhe janë prononcuar për media, njofton Klan Kosova.

Ilir Meta ka thënë se në Kosovë ka qëndruar vetëm për vikend dhe ka takuar miqtë e tij të shumtë që i ka këtu.

Ndërsa, duke iu referuar krizës politike, ka shtuar se ka parë shumë mundësi për zgjidhje dhe dialogë për ngërçin që po vazhdon në politikën kosovare.

Ai ka thënë e nuk ka ardhur këtu në rolin e ndërmjetësuesit, por ka pohuar se po të vinte në Prishtinë e të mos bisedonte me miqtë e tij për krizën politike do të ishte pa përgjegjësi.

Ndërsa Limaj ka thënë se me një analizim të thellë të situatës në të cilën gjendet Kosova, ka shumë mundësi për të dal nga kriza e tanishme politike.