Ngjarjet më të rëndësishme që shënuan vitin 2021 në Maqedoninë e Veriut

Elida Zylbeari

2 years ago

Ngjarjet e vitit 2021, autor: Suad Bajrami/Portalb.mk

Nëse mund të përmblidhet në një fjali, 2021 ishte viti i tragjedive të mëdha.

Viti filloi me shpresa të mëdha të tipit: më në fund kemi vaksina, pandemia do të mbarojë, do të kemi jetë normale, do të udhëtojmë lirshëm, dhe madje do t’i heqim qafe maskat… Dhe gjithçka shkonte sipas planit, bile me rrëmuja te mëdha para pikave të vaksinimit. Diku organizimi ishte më i mirë, diku më i keq, megjithatë ecte disi. Madje, në pranverë kishte frikë, posaçërisht nga gazetarët se po na mbarojnë vaksinat e na lënë pa e marrë. Megjithatë, si pushtet i katërt në një vend me demokraci të dyshimtë, u vaksinuam dhe ne.

Por ama, ka një problem, jo gjithë janë vaksinuar, dhe kjo pandemi e dreqit u kthye në pandemi e të pavaksinuarve, me numër katastrofal të vdekjeve. Spitalet u shndërruan në morge. Pamjet e trishta nëpër rrjetet sociale me ngushëllime dhe lajmërimet për varrosje, dita ditës na ndjellnin frikë, trishtim dhe neveri… aman më, a ka fund?! Po ja që nuk ka fund! Sepse nuk vaksinohemi. Virusi nuk do të zhduket vetvetiu dhe vaksinat nuk e mbytin atë, por ajo që kemi mundur ta bëjmë është ta mbrojmë veten dhe të afërmit. A nuk vaksinohemi sepse nuk lexojmë gjërat e vërteta. Lufta me dezinformatat që madje dhe marrin jetë njerëzish, ishte sfidë personale e redaksisë tonë.
Dhe lufta vazhdon, gjithnjë duke mbrojtur profesionalitetin gazetaresk.
Deri sa të vaksinohen të gjithë ata 1.8 milionë njerëz, gjë që na zbuloi regjistrimi i famshëm, i cili më në fund më, pas 19 viteve u realizua!

E kur të arrijmë imunitetin kolektiv, nuk do të kemi më orët policore siç ndodhi në pranverë (disa prej tyre ta fyenin inteligjencën me orarin e tyre, po nejse). Madje, dhe ekonomia do të lulëzonte dhe kriza ekonomike do të ishte më e përballueshme. Kur jemi te kriza, menduam që vitin e kaluar goditja më e madhe erdhi në rritjen e çmimit të energjisë elektrike… sa gabim që ishim. Kriza sapo ka filluar, me shtrenjtimet e çdolloji që po ndodhin.

Dhe çfarë është më keq se të jetosh në pandemi dhe pa para? Të digjesh i gjallë! Përjetuam djegie të shpirtit, dhe atë dy herë! Sikur të mos mjaftonte tragjedia e madhe e spitalit të Tetovës, ndodhi dhe ajo e autostradës në Bullgari. Të shkosh në spital për t’u shëruar dhe të dalësh i karbonizuar, këtë ua mundëson shteti i korruptuar i Maqedonisë së Veriut. Të shkosh për të shëtitur dhe të kthehesh i karbonizuar, këtë, të nderuar lexues, ua mundëson shteti i korruptuar i Maqedonisë së Veriut. Dhe e dini çka djeg më shumë? Mosdënueshmëria. Me vite! Sikur u mësuam me padrejtësinë në këtë vend.

Ministria e padrejtësisë dhe gjykatat së bashku me prokurorinë, vazhdimisht “reformohen”. Kemi ndjekur plane aksionare e kushedi sa konferenca për shtyp, duke na bindur se drejtësia sapo ka ardhur me reformat “taze”. Ama ajo që shohim në praktikë, lë shumë për të dëshiruar.

Ah dhe zgjedhjet ndodhën, si zakonisht, nuk shkon vit pa mos pasur të tilla. Hiper-demokraci. Ndërrim pushteti por jo dhe fytyra të reja. Dorëheqja e kryeministrit ishte e pashpjegueshme. Jo ajo e liderit partiak, por kjo e dyta thjeshtë të bën të mendosh se i ka ikur përgjegjësisë për kontestin me Bullgarinë. Një tjetër temë dhe golgotë që nuk ka fund. Krahas asaj që as këtë vit nuk u “evropianizuam”, gjë që nënkupton se duhet së paku të respektojmë ligjet dhe të drejtat njerëzore, të çrrënjosim korrupsionin, padrejtësinë dhe të shndërrohemi në qytetarë me ndërgjegje kolektive, e lamë të pazgjidhur kontestin me fqinjin tonë bullgar, gjuhën e së cilit thuajse gjithë e kuptojmë.
U dhanë disa data se kur Evropa do na thotë atë “po”-në historike, ama siç tallen në rrjetet sociale, nuk na kallëzuan vitin..
Kjo sfidë, pra, i mbetet qeverisë së re dhe gjithë politikanëve tanë, të cilëve duke pasur parasysh ndryshimet klimatike dhe problemet më të mëdha me pandeminë dhe krizën energjetike dhe ekonomike, si redaksi ju dëshirojmë të “bien në mend”, të punojnë seriozisht për një ardhmëri më të mirë, dhe mos merren me njëri tjetrin. E as me inate politike fëmijërore, skena që shpesh shohim në Këshillin e Komunës së Tetovës, që për herë të parë vendosi të na hapë dyert në ‘mbretërinë’ e tyre për t’i parë se çfarë vendimesh merren.

Ka dhe shumë ndodhi që duhet komentuar, por mos e zgjasim. Urojmë që 2022 të jetë më i mëshirshëm ndaj neve, më i shëndoshë dhe më i vëmendshëm ndaj shkatërrimit që ia bëjmë mjedisit jetësor.

Më poshtë, ekipi i Portalb-it ka bërë një radhitje kronologjike të të gjitha ndodhive më të rëndësishme politiko-sociale në vend të radhitura sipas datave dhe muajve përkatës.

JANAR

2 janar	245 kompani morën nga Qeveria mbi 12 milionë denarë mbështetje financiare për punëtorët, por nuk ua dhanë rrogat	https://wp.me/patqqI-32qx
4 janar	Prokuroria ngriti aktakuzë kundër anëtarit të Këshillit Gjyqësor Zoran Teofillovskit	https://wp.me/patqqI-32uK
12 janar	Kuvendi zgjodhi kryetarin dhe anëtarët e ri të KSHZ-së	https://wp.me/patqqI-32K4
13 janar	Raport alarmues i UNESCO-s për Liqenin e Ohrit	https://wp.me/patqqI-32Mu
17 janar	Komuna e Tetovës bleu pesë autobusë me 1.2 milionë euro kredi që duhet paguar për 13 vite	https://wp.me/patqqI-32WV
20 janar	Komuna e Sarajit filloi me rrënimin e objekteve pranë Liqenit Treska	https://wp.me/patqqI-333k
20 janar	Këshilli Gjyqësor e shkarkoi gjyqtaren Tatjana Mihajllova për shkak të abuzimit me AKMIS	https://wp.me/patqqI-334p
21 janar	Rasti “Monstra”, Prokuroria e tërhoqi akuzën për Sami Lutën për të cilën paraprakisht u dënua me burgim të përjetshëm	https://wp.me/patqqI-337E
25 janar	Kandidati i BDI-së për kryeministër, Naser Ziberi, u zgjodh Avokat i Popullit	https://wp.me/patqqI-33h8
27 janar	Varianti britanik i virusit korona arriti në Maqedoninë e Veriut	https://wp.me/patqqI-33lk
28 janar	U riaktivizua “Dhoma publike” ku shpërndahen fotografi private të vajzave	https://wp.me/patqqI-33mh
29 janar	Protestë për rastin “Monstra” në Shkup: Të shkarkohet prokurorja Fetai, të ndërhyjnë ndërkombëtarët	https://wp.me/patqqI-33nh

Rraporti i UNESCO-s për Liqenin e Ohrit, përmban kritika dhe thekson rreziqet në secilën prej fushave të shqyrtuara, nga urbanizimi dhe ndërtimet ilegale, përmes turizmit dhe mbrojtjes së biodiversitetit e deri te infrastruktura dhe trajtimi i mbeturinave dhe ujërave të zeza. Foto nga Portalb.mk/Suad Bajrami

SHKURT

3 shkurt	Shkup, “Ti nuk je fajtore”: Qindra protestues i dolën në mbrojtje viktimave të grupit “Dhoma Publike”	https://wp.me/patqqI-33pz
3 shkurt	Padi penale kundër 8 zyrtarëve të MPB-së: Kanë dhënë patenta shoferi pa testime e dokumente	https://wp.me/patqqI-33DB
4 shkurt	1.180 administratorë prej 1.349 që kanë marrë rrogë e nuk kanë shkuar në punë, e kanë nënshkruar vendimin e shpërndarjes	https://wp.me/patqqI-33EO
12 shkurt	Besa Ademi u zgjodh kryetare e Gjykatës Supreme	https://wp.me/patqqI-33Um
12 shkurt	Ish kryetarit të Byrosë për Siguri Publike, Mitko Çavkov iu ul dënimi për 2 vjet, Alimit për 1, Gjykata e Apelit e publikoi vendimin për “27 Prillin”	https://wp.me/patqqI-33Xu
13 shkurt	2 vjet nga aksidenti i autobusit në Llaskarcë ku humbën jetën 16 persona, procesi gjyqësor ende pa epilog	https://wp.me/patqqI-33YO
18 shkurt	U regjistrua Bashkësia Islame Selefiste në RMV, BFI u deklarua se është kundër unitetit të muslimanëve	https://wp.me/patqqI-34by
21 shkurt	U arratis ish shefi i Policisë Sekrete Sasho Mijallkov dhe pas 2 ditëve vetë u paraqit në Prokurori	https://wp.me/patqqI-34qG
22 shkurt	Protestë për rastin “Almiri”: Gjykata të mos tallet me drejtësinë	https://wp.me/patqqI-34jJ
23 shkurt	Aktgjykim për rastin “Monstra”, tre burgime të përjetshme, dy persona u dënuan me 15 vjet dhe 9 vjet	https://wp.me/patqqI-34mj
26 shkurt	Përleshje me policinë në protestën për “Monstrën”, pasi u shpall aktgjykimi, disa protestues u dënuam me burg për prishje të rendit dhe qetësisë publike	https://wp.me/patqqI-34nM
26 shkurt	Gjykata Penale i shpalli fajtor të akuzuarit për rastin e përgjimeve “Target-Fortesa”, Sasho Mijallkov u dënua me 12 vjet burg, Gordana Jankulloska me 4	https://wp.me/patqqI-34wy

Rasti “Monstra”, foto arkiv nga Portalb.mk, nga e djathta: Fejzi Aziri, Haki Aziri, Agim Ismailloviq. Alil Demiri dhe Afrim Ismailloviq (të cilët janë në arrati) bashkë me Agim Ismailloviqin, u dënuan me burgim të përjetshëm për veprën “terrorizëm”, Fejzi Aziri u dënua me 15 vjet burg për “ndihmë”, ndërkaq Haki Aziri u dënua me 9 vjet burg, gjithashtu për ndihmë. I akuzuari Sami Luta u shpall i pafajshëm. Me vendimin nuk u pajtua mbrojtja, u organizuan dhe protesta.

MARS

3 mars	Shkuan në burg familjarët e Almirit për të mbajtur dënimin me burg	https://wp.me/patqqI-34Jn
4 mars	Protestë për “Dhomën publike”, organizatorët kërkuan që më 8 Mars gratë të lirohen nga puna, të marrin pjesë në marsh	https://wp.me/patqqI-34L5
5 mars	U ekstradua nga Bullgaria i arratisuri Igor Spasov, i dënuar për vrasjen e Martin Neshkovskit	https://wp.me/patqqI-34Qn
10 mars	Orë policore në RMV si masë për parandalimin e shpërndarjen së COVID-19	https://wp.me/patqqI-351B
11 mars	Është shkarkuar Sofija Laliçiq, e cila sipas përgjimeve, ishte bërë gjykatëse me porosi të Mijallkovit	https://wp.me/patqqI-352Z
16 mars	Tragjedi në Gostivar, një djalosh 7-vjeçar humbi jetë nga zjarri në banesën ku jetonte, paraburgim për nënën e cila akuzohet se ia ka lidhur këmbët me zinxhir	https://wp.me/patqqI-35f7
17 mars	Akuzohen për plagjiaturë disa profesorë të Fakultetit të Mjekësisë së Universitetit të Tetovës	https://wp.me/patqqI-35hJ
18 mars	Libri i gjeografisë për vitin e dytë – gjimnaz, në të cilin fyhen shqiptarët, pas shumë reagimeve u tërhoq nga përdorimi	https://wp.me/patqqI-35jF
25 mars	Në moshën 46-vjeçare, ndërroi jetë aktori Luran Ahmeti	https://wp.me/patqqI-35Di
26 mars	Rigjykimi për rastin në Gjorçe Petrov ku mbeti i vdekur maturanti Angel Petkovski, Gjykata shpalli fajtor Naser Eshtrefin dhe e dënoi me 13 vjet burg, 1 më pak se në gjykimin e parë	https://wp.me/patqqI-35E5
29 mars	Takim mes liderëve, Zoran Zaev – Hristijan Mickoski, regjistrimi i popullsisë që duhej të mbahet në prill, u shty për në shtator	https://wp.me/patqqI-35K2

PRILL

1 prill	Qeveria shpalli gjendje krize për 30 ditë për shkak të situatës me COVID-19, salla sportive “Boris Trajkovski” u shndërrua në qendër për vaksinim të popullatës	https://wp.me/patqqI-35SB
7 prill	Pas vendimit të Qeverisë u mbyllën objektet hotelerike, bastoret dhe kazinot	https://wp.me/patqqI-365i
7 prill	Ndërroi jetë ish prokurori famëkeq, Marko Zvërlevski	https://wp.me/patqqI-365u
9 prill	Protestë kundër aktgjykimit për rastin e vrasjes së komitit Sazdovski, Besir Bela dhe Skender Demiri u dënuan me nga 16 vjet burg, ndërkaq Jeton Luzha u ekstradua nga Gjermania për t’u gjykuar	https://wp.me/patqqI-368A
13 prill	Ish kreu i policisë sekrete, Sasho Mijallkov u dënua me 8 vjet burg në rastin “Thesari”	https://wp.me/patqqI-36hz
14 prill	Dragi Rashkovski dha dorëheqje nga posti sekretar i përgjithshëm i Qeverisë, pas akuzave për korrupsion, dy ditë më vonë policia e arrestoi, ndërkaq pas propozimit të Prokurorisë, Gjykata i shqiptoi paraburgim	https://wp.me/patqqI-36p5
16 prill	Aleanca për Shqiptarët dhe Alternativa arritën marrëveshje me kryeministrin Zoran Zaev për ligjin për nënshtetësi: T’u jepet të gjithë atyre që jetojnë në RMV mbi 30 vite	https://wp.me/patqqI-36qi
25 prill	Nëpërmjet protestës, VMRO-DPMNE-ja kërkoi lirimin e të dënuarve për terrorizëm në rastin 27 prillit të dhunshëm në Kuvend	https://wp.me/patqqI-36KQ
26 prill	Përplasje mes MASH-it dhe nxënësve për propozimin për libra digjital, në vend atyre të shtypura	https://wp.me/patqqI-36Og
29 prill	RMV duhet të kthejë 1.200.000 euro në IPA fondet, për shkak të 38.000 eurove ryshfet të ish sekretarit shtetëror në MSHIA, Jahi Jahiu	https://wp.me/patqqI-36X1

Ish shefi i Drejtorisë për Siguri dhe Kundërzbulim (DSK), Sasho Mijallkov u dënua me 20 vjet burg në dy lëndë, para shqiptimit të dënimit tentoi të arratiset, por vet u paraqit në Prokurori pasi që pati reagime të ashpra nga opinioni brendshëm dhe ndërkombëtar

MAJ

6 maj	Komuna e Çairit bashkë me Qytetin e Shkupit, gjatë orës policore, vendosi bankina të betonit përmes bulevardit “Cvetan Dimov”	https://wp.me/patqqI-37bk
9 maj	6 vjet nga konflikti i armatosur në “Lagjen e Trimave” të Kumanovës, asgjë nga hetimi ndëkombëtar	https://wp.me/patqqI-37jZ
12 maj	Prokuroria ngriti akuzë për “Parcelat në Vodno” kundër Gruevskit, Mijallkovit, Kamçevit dhe tre personave të tjerë	https://wp.me/patqqI-37rt
14 maj	Presidenti Pendarovski refuzoi ta nënshkruajë dekretin për Ligjin për legalizimin e objekteve pa leje, pasi që ishte kundër Kushtetutës dhe interesit publik	https://wp.me/patqqI-37vf
18 maj	MPJ e shpalli një diplomat rus person të padëshiruar	https://wp.me/patqqI-37CX
26 maj	Presidentët e RMV-së dhe Bullgarisë, Pendarovski dhe Radev, për vizitë të përbashkët në Romë, derisa vazhdojnë bisedimet për veton bullgare	https://wp.me/patqqI-37Rl
29 maj	U hap Dino parku në Shkup – 41 dinozaurë me lëvizje dhe tinguj për t’i zbaviitur qytetarët	https://wp.me/patqqI-37Z1
29 maj	Qeveria e tërhoqi propozimin ligjin kontestues për objektet pa leje, pas reagimeve të shumta në opinion	https://wp.me/patqqI-37YZ
31 maj	UNESCO sërish me kritikë prej 125 faqesh për mbrojtjen e trashëgimisë kulturore dhe natyrore të Liqenit të Ohrit	https://wp.me/patqqI-384A

Udhëtim i përbashkët në Romë i presidentëve të RMV-së dhe Bullgarisë, Stevo Pendarovski – Rumen Radev, për të vizituar bazilikën “Shën Mërija Maxhore”, ku bashkë u dhanë nderime vëllezërve shën Kirili dhe Metodi. Vetoja bullgare vazhdon të jetë pengesa kryesore për hapjen e bisedimeve RMV-BE, për shkak çështjeve historike. Pavarësisht thirrjeve të BE-së dhe SHBA-së, ende nuk është gjetur zgjidhje. Foto nga Presidenca e RMV-së.

QERSHOR

1 qershor	Masa të reja antikovid – pa maska në ambient të hapur, lejohet organizimi i dasmave, por me disa kushte	https://wp.me/patqqI-383a
1 qershor	BE ndau 80 milionë euro ndihmë financiare për RMV-në, për ti rikuperuar dëmet e pandemisë	https://wp.me/patqqI-386V
5 qershor	Ali Ahmeti e shpalli Bashkimin Demokratik për Integrim “parti të gjelbër”	https://wp.me/patqqI-38ga
7 qershor	MSH informoi se ka arritur varianti “Delta” i COVID-19 në RMV	https://wp.me/patqqI-38iP
9 qershor	Presidenti amerikan Joe Biden urdhëroi që të vendosen në “listë të zezë” ata që punojnë kundër Marrëveshjes së Prespës	https://wp.me/patqqI-38p2
17 qershor	Tre vjet nga Marrëveshja e Prespës, sipas të cilës Maqedonia e ndërroi emrin në Maqedonia e Veriut	https://wp.me/patqqI-38Jo
20 qershor	Atletja Drita Islami e ka thyer rekordin shtetëror dhe fitoi në 400 metra me pengesa në Kampionatin Evropian në Qipro	https://wp.me/patqqI-38OT
22 qershor	Presidenca portugeze nuk arriti ta bind Bullgarinë për ta hequr veton ndaj RMV-së për fillimin e bisedimeve me BE-në	https://wp.me/patqqI-38Uy
29 qershor	Pas 19 vitesh, pas vendimit për tërheqjes së SHBA-së, përfundoi pjesëmarrja e ARM-së në misionin paqësor në Afganistan	https://wp.me/patqqI-399s
30 qershor	Mali Sharr u bë park Nacional	https://wp.me/patqqI-39dF

Me 66 vota Kuvendi e miratoi ligjin për shpalljen e një pjese të Malit Sharr për park kombëtar. Me miratimin e këtij ligji, shteti ynë fitoi parkun e katërt kombëtar pas shpalljes së atij të fundit në vitin 1958 dhe të parit pas pavarësisë së Republikës së Maqedonisë së Veriut. Foto nga projekti i Metamorfozis “STEP”KORRIK

1 korrik	U hoq roamingu midis gjashtë vendeve të Ballkanit Perëndimor	https://wp.me/patqqI-376o
9 korrik	Udhëheqësia sllovene me BE-në e përkrahu propozimin portugez për kontestin RMV-Bullgari	https://wp.me/patqqI-39zX
14 korrik	Prokuroria ngriti akuzë: Mile Janakieski dhe Igor Janushev në mesin e 4 personave të cilët kundërligjshëm e kanë favorizuar kompaninë kineze për autobusët dykatësh	https://wp.me/patqqI-39ID
18 korrik	4 luftëtarë të ISIS nga Iraku dhe Afganistani, bashkë me 5 gra dhe 14 fëmijë u riatdhesuan në RMV	https://wp.me/patqqI-39S0
20 korrik	Disa raste të ish Prokurorisë Speciale pas shumë vitesh gjykime, fillojnë nga e para	https://wp.me/patqqI-39WW
22 korrik	LSDM dakordoi koalicion parazgjedhor për zgjedhjet lokale me BDI-në, PDSH-në dhe Lëvizjen BESA	https://wp.me/patqqI-3a30
23 korrik	Gjykata Penale e shpalli të pafajshëm Sasho Mijallkovin në lëndën “Tortura”	https://wp.me/patqqI-3a4c
23 korrik	UNESKO e anuloi vendimin për vendosjen e Ohrit në listën e trashëgimive botërore të rrezikuara	https://wp.me/patqqI-3a3q
26 korrik	Gjykata i dënoi me gjithsej 25 vjet burg ish kryeparlamentarin, Veljanovski, ish ministrat Janakieski dhe Ristovski dhe shefin e Policisë Sekrete, Atanasov	https://wp.me/patqqI-3a9y
28 korrik	RMV, filloi monitorimi ndërkombëtar i rasteve gjyqësore të krimit të organizuar dhe korrupsionit të lartë	https://wp.me/patqqI-3af5
28 korrik	Apeli e ktheu në rigjykim rastin “Titanik 3”, janë shfuqizuar dënimet me burg për Ejup Alimin dhe Ismet Gurin	https://wp.me/patqqI-3afY
29 korrik	Me 95 vota “për” u miratua Rezoluta e VMRO-DPMNE-së për “vijat e kuqe” në bisedimet me Bullgarinë, partitë shqiptare kundër	https://wp.me/patqqI-3ahq

Gjykata Penale e Shkupit i shpalli fajtorë funksionarët e lartë të VMRO-DPMNE sepse kanë organizuar ngjarjet e dhunshme të “27 prillit”. Trajko Veljanovski (ish kryetar i Kuvendit) – 6 vjet e 6 muaj burg, Mile Janakieski (ish ministri i Transportit dhe Lidhjeve) – 6 vjet e 3 muaj burg, Spiro Ristoski (ish ministri i Arsimit dhe Shkencës) – 6 vjet e 3 muaj burg, Vlladimir Atanasov (ish drejtor i Policisë Sekrete) – 6 vjet burg. Në hetim u përfshinë edhe ish-kryeministrin Nikolla Gruevski dhe ish-zyrtari i inteligjencës Nikolla Boshkovski, por procedura për ta u ndal pasi janë në arrati.

GUSHT

5 gusht	Qeveria shpalli 30 ditë gjendje krize për shkak shpërndarjes së zjarreve	https://wp.me/patqqI-3axw
8 gusht	Presidenti Stevo Pendarovski e angazhoi ushtrinë për t’i shuar zjarret masive	https://wp.me/patqqI-3aFe
9 gusht	Pas 20 viteve u gjet dokumenti origjinal i Marrëveshjes së Ohrit	https://wp.me/patqqI-3aGT
14 gusht	Qeveria i shtrëngoi masat kundër COVID-19, varianti “Delta” solli valën e katërt me qindra të infektuar dhe dhjetëra të vdekur në ditë	https://wp.me/patqqI-3aRK
15 gusht	Në kulmin e infektimeve, protestë skandaloze në Shkup kundër vaksinimit dhe masave anti-Covid-19, turma i dogji maskat dhe bëri thirrje “mjekët janë vrasës”	https://wp.me/patqqI-3aSV
15 gusht	Ndodhi dramatike në Afganistan, Qeveria u angazhua për largimin e shtetasve të RMV-së dhe bisedoi me SHBA-në për të pranuar 190 refugjatë transitorë afganë	https://wp.me/patqqI-3aT0
16 gusht	Kufizime të reja, në restorant, kafene, qendra tregtar, ngjarje në ambient të mbyllur, me certifikatë vaksine	https://wp.me/patqqI-3aSO
23 gusht	Disa persona i prenë gypat e furnizimit me oksigjen në spitalin e Tetovës	https://wp.me/patqqI-3b8x
27 gusht	Aleanca për Shqiptarët dhe Alternativa arritën koalicion parazgjedhor me VMRO – DPMNE-në për zgjedhjet lokale	https://wp.me/patqqI-3blP
28 gusht	Zoran Zaev dhe Aleksis Cipras u dekoruan me çmimin ndërkombëtar të paqes “Westphalia” për Marrëveshjen e Prespës	https://wp.me/patqqI-3boi

Situatë alarmante gjatë verës me zjarret në rajonet e Shkupit, Strumicës, Kumanovës, Dellçevës, Pehçevës, Koçanit, Ohrit, Berovës, Manastirit dhe Shtipit. Qeveria shpalli 30 ditë gjendje krize, ndërkaq presidenti dërgoi ushtrinë për t’i ndihmuar zjarrfikësit. Foto nga zjarri në Koçan. Foto nga Portalb.mk, zjarri në Berovë

SHTATOR

1 shtator	Masat ani-covid: Hyrja në RMV vetëm me vërtetim për vaksinim ose PCR test	https://wp.me/patqqI-3byf
4 shtator	Sead Koçan në vend që të jetë në burg është liruar, shkaktoi aksident trafiku ku 1 person humbi jetën 7 të tjerë u lënduan	https://wp.me/patqqI-3bHg
5 shtator	Pas 19 vitesh, filloi regjistrimi i popullsisë, ekonomive familjare dhe banesave	https://wp.me/patqqI-3bHr
8 shtator	Maqedonia e Veriut me program solemn dhe paradë ushtarake e shënoi 30 vjetorin e pavarësisë	https://wp.me/patqqI-3bNY
8 shtator	Tragjedi në Tetovë, u dogj Spitali Modular ku trajtoheshin pacienten me COVID-19, 14 persona humbën jetën, 12 të tjerë u plagosën, 3 ditë zie në mbarë vendin	https://wp.me/patqqI-3bPq
9 shtator	Në Tetovë u mbajt marsh në nder të viktimave në spitalin modular	https://wp.me/patqqI-3bXn
10 shtator	Ministri i Shëndetësisë Venko Filipçe, zëvendësi i tij Ilir Hasani dhe dy drejtorët e Spitalit Modular dhanë dorëheqje	https://wp.me/patqqI-3bW5
15 shtator	12 ditë para fushatës zgjedhore në Kuvend kaluan ndryshimet në Kodin Zgjedhor	https://wp.me/patqqI-3c73
16 shtator	Seancë e përbashkët qeveritare mes Maqedonisë së Veriut dhe Kosovës, u nënshkruan 11 marrëveshje	https://wp.me/patqqI-3c8K
17 shtator	Protestë në Tetovë për të kërkuar përgjegjësi për spitalin modular, pas përleshjeve me policinë, 5 persona u arrestuan	https://wp.me/patqqI-3c7x
27 shtator	Filloi fushata zgjedhore për zgjedhjet lokale të 17 tetorit	https://wp.me/patqqI-3cAO
28 shtator	Kryetarja e Komisionit Evropian, Ursula von der Leyen e vizitoi Shkupin, paralajmëroi intensifikim të bisedimeve me Bullgarinë për heqjen e vetos	https://wp.me/patqqI-3cLc
30 shtator	Mbaroi procesi i regjistrimit të popullsisë në Maqedoninë Veriut	https://wp.me/patqqI-3cVP

TETOR

5 tetor	Prokuroria publikoi të dhënat nga raporti i ekspertizës së Krim-Teknikës së MPB-së, sipas tyre, zjarri në Spitalin Modular të Tetovës është shkaktuar nga kablloja e defibrilatorit	https://wp.me/patqqI-3d6U
5 tetor	Kryeministri Zoran Zaevi nuk i pranoi dorëheqjet e ministrit të Shëndetësisë Venko Filipçe dhe zëvendësit të tij Ilir Hasani për tragjedinë në Spitalin Modular në Tetovë	https://wp.me/patqqI-3d8e
6 tetor	U mbajt Samiti për Ballkanin Perëndimor në Bërdo të Sllovenisë, Maqedonia nuk debllokoi çështjen me Bullgarinë	https://wp.me/patqqI-3dcI
8 tetor	Dënim me kusht dhe dënim prej 50 eurove për pronarin që ndërtoi pa leje te Q.T. Mavrovasja	https://wp.me/patqqI-3diz
13 tetor	Lirim me kusht për pesë protestuesit për tragjedinë e zjarrit në Tetovë, të akuzuarit pranuan fajin dhe kërkuan falje	https://wp.me/patqqI-3dr1
17 tetor	U mbajt rrethi i parë i zgjedhjeve lokale 2021 për herë të parë me identifikim biometrik, VMRO-DPMNE fitoi në 22 komuna, LSDM në 9, BDI në 3	https://wp.me/patqqI-3dBY
19 tetor	KE e publikoi raportin e progresit për Maqedoninë e Veriut	https://wp.me/patqqI-3dOG
25 tetor	Partia në pushtet Lëvizja Besa zyrtarizoi bashkëpunimin me partinë opozitare Aleancën për Shqiptarët për rrethin e dytë të zgjedhjeve lokale	https://wp.me/patqqI-3e0N
26 tetor	LSDM nisi me fushatën se kandidatja për kryetare të Qytetit të Shkupit Danella Arsovska dhe bashkëshorti i saj, kanë nënshtetësi bullgare	https://wp.me/patqqI-3e4K
31 tetor	U mbajt rrethi i dytë i zgjedhjeve lokale, në Dibër do të ketë rivotim, rezultati final i të dy rretheve: VMRO-DPMNE 42, LSDM 17, BDI 11, BESA 2, ASH 2, PDSH 1, GROM 1, PDT 1, PLD/DOM 1 dhe 2 komuna i fituan kandidatë të pavarur	https://wp.me/patqqI-3egd
31 tetor	Pas humbjes së zgjedhjeve lokale, Zoran Zaev paralajmëroi dorëheqje nga pozita e kryetarit të LSDM-së dhe kryeministrit	https://wp.me/patqqI-3ekZ

Fotografia e hartës së zgjedhjeve lokale për katër vite u ndryshua tërësisht. Opozitarja VMRO-DPMNE, e mori shumicën e komunave me të cilat deri tani ka udhëhequr LSDM, përfshirë edhe Qytetin e Shkupit. Gjithsej VMRO-DPMNE tani udhëheq me 42 komuna dhe Qytetin e Shkupit, ndërkaq LSDM me vetëm 17. Në bllokun shqiptar, BDI-ja tani udhëheq me 11 komuna, Lëvizja BESA me 2, Aleanca për Shqiptarët 2 dhe PDSH-ja me 1. Kandidatët e pavarur, do të udhëheqin me 2 komuna, Partia Demokratike e Turqve me 1, PLD/DOM 1 dhe GROM 1 komunë. Pa dështimit, kryeministri dhe lideri i opozitës, Zoran Zaev, paralajmëroi dorëheqje nga pozitat.

NËNTOR

2 nëntor	Pas hulumtimit të Portalb.mk, Drejtoria për Menaxhim me Libra Amë vendosi të mos u kërkojë qytetarëve, certifikata të lindjes “jo më të vjetra se 6 muaj”	https://wp.me/patqqI-3epa
5 nëntor	Lideri opozitar Hristijan Mickoski njoftoi se ka shumicë parlamentare, pasi në FB publikoi fotografi me përfaqësues të ASH-së, Alternativës, Lëvizjes BESA dhe Levica	https://wp.me/patqqI-3ezW
9 nëntor	Qeveria e RMV-së shpalli 30 ditë gjendje krize për furnizim me energji elektrike	https://wp.me/patqqI-3eFe
10 nëntor	Derisa vendi është në krizë politike, kryeministri holandez Mark Rutte arriti për vizitë n Shkup	https://wp.me/patqqI-3eJ2
11 nëntor	Opozitës i dështoi votëbesimi ndaj Qeverisë, pasi deputeti i Lëvizjes BESA nuk u paraqit në Kuvend. Partitë opozitare akuzuan për kidnapim, Rexhepi u paraqit me video-porosi për t’i demantuar	https://wp.me/patqqI-3eOm
12 nëntor	Ministri Arjanit Hoxha dhe dy zëvendësministrat e Besës dhanë dorëheqje nga Qeveria, partia e përjashtoi deputetin Rexhepi	https://wp.me/patqqI-3ePp
14 nëntor	BDI e fitoi ASH-Alternativën në rivotimin për Dibrën	https://wp.me/patqqI-3eTt
17 nëntor	Masa të reja anti-kovid, të punësuarit në sektorin publik duhet të paraqesin certifikatë vaksinimi ose test PCR të cilin duhet ta paguajnë vetë	https://wp.me/patqqI-3f0w
23 nëntor	Tragjedi, autobusi i “Besa Trans” – Shkup që kthehej nga Stambolli, u aksidentua dhe përfshi nga zjarri në autostradën e Bullgarisë “Struma”, 45 persona humbën jetën, në mesin e të cilëve dhe 12 fëmijë, 7 persona shpëtuan – 3 ditë zie në vend, 1 në Kosovë	https://wp.me/patqqI-3fcs
24 nëntor	Autobusi i “Besa Trans Shkup” i cili u dogj në Bullgari nuk ka pasur licencë për transport ndërkombëtar, kompanisë së transportit iu mor licenca për punë	https://wp.me/patqqI-3fin
24 nëntor	Rasti në Gjorçe Petrov, Apeli e konfirmoi dënimin për Naser Eshtrefin, familja e të dënuarit do të ankohet në Supreme	https://wp.me/patqqI-3fgQ
24 nëntor	Nxënësit e ShF “Ismail Qemali” zhvilluan marsh për nderë 5 nxënësve të kësaj shkolle që humbën jetën në aksidentin e autobusit në Bullgari	https://wp.me/patqqI-3fh3
29 nëntor	Burim Sejdini u rizgjodh kryetar i Gjykatës Administrative	https://wp.me/patqqI-3fuq
30 nëntor	U hap konferenca ndërkombëtare katërditore “E-shoqëri.mk” e organizuar nga “Metamorfozis”	https://wp.me/patqqI-3fwU

Në autostradën “Struma” në Bullgarinë Perëndimore u aksidentua një autobus nga RMV, i cili ishte duke u kthyer nga një ekskursion në Stamboll. Autobusi është përfshirë nga flakët dhe humbën jetën 45 persona, në mesin e të cilëve dhe 12 fëmijë. Për tragjedinë e madhe, në RMV u shpallën tri ditë zi, ndërkaq në Kosovë dhe Bullgari nga 1 ditë. Në ndërkohë autoritetet e vendit zbuluan se autobusi i aksidentuar s’ka pasur licencë për transport ndërkombëtar dhe ia morën lejen për punë kompanisë transportuese “Besa Trans”, e cila e kishte organizuar udhëtimin. Prokurorët bullgar kanë paralajmëruar se së shpejti do të dalin me raport nga hetimi. Gjithashtu edhe Prokuroria e RMV-së po heton punën e kompanisë. Autobusi i aksidentuar në Bullgari, foto nga BTV, Ladislav Cvetkov

DHJETOR

1 dhjetor	Reshat Qahili u zgjodh ushtruesi i detyrës së rektorit në UT	https://wp.me/patqqI-3fC0
1 dhjetor	Prej sot një qese plastike do ta paguani 15 denarë	https://wp.me/patqqI-3ftZ
3 dhjetor	Në Aeroportin e Shkupit, me nderime dhe protokoll shtetëror u pritën viktimat e aksidentit në Bullgari, nderime dhanë funksionarë të lartë shtetëror nga vendi dhe rajoni	https://wp.me/patqqI-3fG7
5 dhjetor	Pas disa takimeve mes Zoran Zaevit dhe Afrim Gashit, u formalizua që opozitarja Alternativa të hyjë në Qeveri	https://wp.me/patqqI-3fKg
6 dhjetor	Zëvendës ndihmës sekretari i shtetit të SHBA-së, Gabriel Escobar për vizitë në Shkup zhvilloi takime me funksionarët e vendit	https://wp.me/patqqI-3fMF
9 dhjetor	U mbajt Samiti për Demokraci nën organizimin e SHBA-së, pjesëmarrës edhe presidenti i RMV-së	https://wp.me/patqqI-3fXZ
12 dhjetor	Dimitar Kovaçevski u zgjodh kryetar i ri i LSDM-së, Pasi paraprakisht Zaev dha dorëheqje	https://wp.me/patqqI-3g70
15 dhjetor	Për herë të parë një president i RMV-së viziton Kosovën, Stevo Pendarovski në Prishtinë	https://wp.me/patqqI-3gaE
16 dhjetor	Bullgaria e përsëriti veton ndaj RMV-së për fillimin e bisedimeve RMV-BE, në mbledhjen e Këshillit për Punë të Përgjithshme	https://wp.me/patqqI-3g9F
20 dhjetor	Kuvendi e miratoi ligjin që e diela të jetë ditë jopune	https://wp.me/patqqI-3go7
22 dhjetor	Zoran Zaev dha dorëheqje nga pozita e kryeministrit	https://wp.me/patqqI-3gsy
24 dhjetor	Varianti i COVID-19 “Omicron”, arriti në Maqedoninë e Veriut	https://wp.me/patqqI-3gAI
29 dhjetor	Kryetari i ri i LSDM-së, Dimitar Kovaçevski e mori mandatin për formimin e Qeverisë së re në RMV	https://wp.me/patqqI-3gIH
29 dhjetor	Apeli për së dyti herë miratoi vendim skandaloz, Sasho Mijallkov doli nga paraburgimi	https://wp.me/patqqI-3gN2

Pasi opozitës i dështoi votëbesimi ndaj qeverisë, Alternativa opozitare iu bashkua shumicës qeveritare për ta zëvendësuar Lëvizjen Besa, e cila doli nga koalicioni qeveritar. Lideri i ri i LSDM-së, Dimitar Kovaçevski pritet të bëjë rikonstruim të qeverisë, shumë prej funksionarëve të lartë kanë paralajmëruar se do të tërhiqen nga pozitat. Opozita vazhdon të kërkojë zgjedhje, pasi që sipas tyre, me humbjen e zgjedhjeve lokale, qeveria aktuale e ka humbur legjitimitetin te populli

LEXO MË SHUMË