Lirie Elezi, gjyqtarja e “Thesarit” – aktgjykimi i të cilit, pa arsyetim është shkruar për pesë muaj

S. B.

1 year ago

Gjykatësja Lirie Elezi ka qenë gjykatës raportues në rastin “Thesari” për të cilin grupi punues nga Këshilli Gjyqësor ka konstatuar se Gjykata e Apelit pa arsyetim 5 muaj e ka shkruar vendimin me të cilin është shfuqizuar dënimi me 9 vjet burg për ish shefin e Policisë Sekrete, Sasho Mijallkov, njofton Fokus, transmeton Portalb.mk.

Ajo është vajzë e ish gjykatësit dhe prokurorit, ndërkaq bashkëshorti i saj punon në Agjencinë për Siguri Kombëtare, gjegjësisht ish Policia Sekrete, me të cilën ka udhëhequr Mijallkov.

Sipas arkivave të mediave, babai i saj i ndjerë ka lindur në një fshatë të Kërçovës, ndërkaq ka qenë gjykatës në Kërçovë dhe në vitin 2018-të është bërë zëvendës i prokurorit të Maqedonisë.

LEXO: Këshilli Gjyqësor: Apeli ka zgjidhur lëndë tjera, ndërsa atë për Mijallkovin në mënyrë të paarsyeshme e ka mbajtur në sirtar

Sipas biografisë së saj zyrtare, gjykatësja Lirie Elezi Ajrullau, ka filluar me punë në Gjykatën e Apelit në vitin 2018-të dhe ka vendosur për lëndë të fushës penale.

Ka diplomuar në vitin 2004 në drejtimin e Fakultetit Juridik në Shkup, ndërkaq provimin e jurispodencës e ka dhënë në vitin 2006. Fillimisht ka punuar në Kuvend, ndërkaq më pas në Institutin Nacional Demokratik në Shkup.

Prej vitit 2005 deri në vitin 2010 ka punuar në Ministrinë e Vetëqeverisjes Lokale. Menjëherë, pas mbarimit të Akademisë për Gjykatës dhe Prokurorë Publik është pranuar në Gjykatën Penale të Shkupit ku ka punuar 7 vjet, deri në vitin 2018-të kur është zgjedhur gjykatëse në Apel.

Prej biografisë që është e publikuar, gjykatësja ka bërë disa trajnime dhe vend dhe jashtë vendit.

Në rastin “Thesari” gjegjësisht për furnizimin e pajisjes britanike për përgjim në Policinë Sekrete, Këshilli Gjyqësor ka konstatuar se nuk ka kaluar kohë e gjatë prej mbajtjes së seancës publike deri në miratimin e vendimit, por nuk ka arsyetim pse Apelit i janë dashur 5 muaj që ta shkruajë aktgjykimin pasi që është miratuar vendimi.

Gjykatës raportues për këtë lëndë ka qenë Elezi, e cila ka pasur kompetencë që të mbajë llogari për dinamikën e lëndës.

Rastin “Thesari” e ka punuar ish Prokuroria Speciale Publike, ndërkaq në hetim janë përfshirë edhe kompania Finzi nëpërmjet të cilës është kryer furnizimi.

Elezi ka qenë pjesë e Këshillit të Gjykatës së Apelit, bashkë me gjykatësit Tanja Mileva dhe Gjoko Ristov, ku është miratuar vendimi që të shfuqizohet masa e paraburgimit shtëpiak për ish sekretarin e përgjithshëm të Qeverisë Dragi Rashkovski me garanci prej 192.000 euro.

Ajo ka qenë pjesë e Apelit bashkë me gjykatësit Zoran Dimitrievski dhe Enver Bexheti të cilët miratuan vendim me të cilin të akuzuarit Orce Kamçev i është shfuqizuar paraburgimi dhe i është pranuar garancia prej 11 milionë eurove.

Këshilli Gjyqësor ka konstatuar se Apeli pa arsyetim i ka zvarritur lëndët “Target – Fortesa” dhe “Thesari” ku i akuzuar kryesor është Mijallkov, ndërkaq veprat e tij në këto raste janë përpara vjetërsimit. Elezi e ka udhëhequr lëndën “Thesari”, ndërkaq me lëndën “Target – Fortesa” ka udhëhequr gjykatësi Enver Bexheti.

Mijallkovi i cili ishte i dënuar në dy lëndë me gjithsej 20 vjet burg, Apeli për 10 ditë e pastroi dhe ua hodhi fajin kolegëve të tyre nga shkalla e parë se “kanë bërë shkelje thelbësore të dispozitave të Ligjit për procedurë Penale, me çka është sjellë në pikëpyetje gjendja faktike dhe zbatimi i rregullt i Kodit Penal”.

LEXO: Viti 2022 i zymtë, popullata e RMV-së nuk i zë besë gjyqësorit, lufta kundër korrupsionit ka dështuar

Në lëndën “Thesari”, e cila i referohet keqpërdorimit të fondeve nga buxheti i shtetit për prokurimin e pajisjeve të komunikimeve elektronike për nevojat e Drejtorisë së Pestë në DSK dhe trajnim për përdorimin e të njëjtës nga një firmë nga Britania e Madhe, i akuzuar i parë është ish-drejtori i DSK-së Sasho Mijallkov si dhe ish-shefi i kabinetit të tij Toni Jakimovski, ish-ndihmës ministri në Ministrinë e Punëve të Brendshme, Nebojsha Stajkoviq dhe ish-shefi i Drejtorisë së Pestë në Ministria e Brendshme, Goran Grujevski. Të tre ngarkohen me keqpërdorim të autoritetit zyrtar, ndërsa Toni Jakimovski për ndihmë.