Zbrazëtirat ligjore janë bë shkak që furgonat të cilët kryejnë transport të organizuar në Komunën e Tetovës të vijojnë me aktivitetin e tyre, kamera e Portalb zbuloi edhe pikë ndalesat e reja të tyre. Edhe pse 10 ditë më herët një gjë e tillë “u ndalua” nga Qeveria e RMV-së, policët jo zyrtarisht na thanë se nuk ka bazë ligjore për dënimin e të njëjtëve, shkruan Portalb.mk.
“U vendos që të ndërpritet transporti publik dhe privat, më saktë të gjitha hyrjet dhe daljet në Tetovë nga komunat e Pollogut dhe të Shkupit (kjo ndalesë vlen vetëm për transportin e organizuar me autobusë dhe furgonë)” kështu thuhet në vendimin të marrë dhjetë ditë më herët me propozim të Shtabit Komunal të Komunës së Tetovës.
Gazetari i Portalb.mk ishte sot në teren për të inspektuar se a respektohet kjo masë, në rrugët e Tetovës shiheshin shumë furgon të cilët transportojnë njerëz prej fshatrave përreth. Megjithatë, rruga ku para disa ditëve ishte plot me furgon, sot dukej e pastër.
Përderisa pikë ndalesa e vjetër ishte e pastër, aty këtu kishte polic të cilët vazhdimisht kalonin për të inspektuar të njëjtën, vetëm disa metra më larg këta transportues i zbarkonin udhëtarët e tyre.
Në bisedë e sipër me një nga policët e qytetit të Tetovës, ai jo zyrtarisht na tregoi se edhe policët kanë rënë në hall, për shkak se përveç vendimit të Qeverisë së RMV-së për ndalesë të transportit publik, nuk ka dekret ligjor i cili sanksionon shkelësit e këtij vendimi.
“Përveç vendimit të cilin e miratoi Qeveria e RMV-së, nuk ka dekret ligjor i cili rregullon dënueshmërinë e shkelësve të kësaj mase për parandalimin e përhapjes së virusit korona. Mere për shembull nenin 206, i cili bukur mirë e rregullon mënyrën dhe formën e dënimit të personave të cilët e shkelin orën policore, një gjë të tillë nuk ka për këta shkelës, siç janë shoferët e furgonave” I tregoi një nga policët gazetarit të Portalb.mk.
Kurse nga Komuna e Tetovës, të cilët edhe janë propozues të kësaj mase restriktive për ndalesë të transportit të organizuar, potencojnë rëndësinë e respektimit të kësaj mase e cila sipas tyre, ka për qëllim uljen e kurbës të të infektuarve në këtë rajon.
“Shtabi i krizës pranë komunës së Tetovës për luftë kundër COVID19 para 12 ditëve propozoi tek qeveria e RMV masën restriktive për ndalesë të transportit të organizuar (autobusë dhe furgonë) nga komuna e Tetovës në[ komunat përreth si dhe anasjelltas.
Kjo masë restriktive ka për qëllim reduktimin e numrit të qytetarëve të cilët udhëtojnë nga njëra komunë në tjetrën, duke marrë parasysh faktin se edhe në komunat përreth në periudhën e kaluar u rrit dukshëm numri i të infektuarve me COVID19, dhe pikërisht ky transport i pakontrolluar në këtë kohë të pandemisë globale shëndetësore paraqet faktor real rreziku.
Jemi të vetëdijshëm që një ndalesë e tillë është pengesë për punëtorët që jetojnë në fshatr por punojnë në Tetovë, por në situatën në të cilën gjendemi shëndeti i qytetarëve mbetet çështje me prioritet më të madh kundrejt të gjitha pasojave të tjera dytësore. Besojmë se me relaksimin e masave restriktive dhe uljen e numrit të të infektuarve edhe kjo masë do të pësojë liberalizim gradual nga ana e organeve kompetente në vend” thanë nga Komuna e Tetovës.
U munduam të kontaktojmë edhe me Qeverinë e RMV-së mirëpo nga atje nuk morëm përgjigje për këtë, sa ju përket shoferëve të furgonave, të njëjtit në momentin kur e kuptonin se bisedojnë me një gazetar, largoheshin për shkak se nuk kishin dëshirë të prononcohen.
Ndryshe, sot është evidentuar edhe një rast i ri me virusin korona në Tetovë me rrethinë, kështu numri i përgjithshëm i të infektuarve në këtë rajon ka arritur në 76, nga të cilët 24 persona janë shëruar kurse 4 kanë ndërruar jetë.