Pyetjeve të prokurores, Fatime Fetai dhe familjarëve të viktimave në rastin “Monstra”, për procedurën për ekstradimin e Alil Demirit dhe Afrim Ismailoviqit, iu është përgjigjur ministrja e Drejtësisë, Renata Deskoska dhe ka njoftuar se, deri te ministri i Drejtësisë së Kosovës, Abelard Tahiri ka dërguar tre shkresa për procedurën në fjalë, transmeton Portalb.mk.
“Ministrja Deskoska do të takohet me familjarët e viktimave në “Monstra”, deri te Kosova ka dërguar tre herë kërkesë për përgjigje”, thanë nga Kabineti i Deskoskës.
Siç kumtojnë nga Kabineti i Deskoskës, sa ka qenë ajo në pushtet, te Tahiri janë dërguar tre shkresa. Një kërkesë për ekstradim, dhe dy urgjenca për prononcim ndaj kërkesës.
- Kërkesa e parë për ekstradim është dërguar në mars të 2013-s, për çfarë Gjykata e Apelit e Kosovës më 22 janar të 2016-s e ka refuzuar të njëjtën,
- Kërkesa e dytë është dërguar më 5 shtator të 2018-s. Nga dorëzimi i kërkesës për ekstradim, deri sot Ministria e Drejtësisë në RMV nuk ka marrë asnjë përgjigje nga Ministria e Drejtësisë e Kosovës. Është dërguar urgjencë për prononcim ndaj kërkesës në fjalë.
- Urgjenca e parë është dërguar më 26 shkurt të 2019-s dhe
- Urgjenca e dytë është dërguar më 3 korrik të 2019-s.
Përndryshe, familjarët e viktimave në rastin “Monstra”, kanë kërkuar takim me ministren e Drejtësisë, Renata Deskoska për të marrë detaje se deri ku është procedura për ekstradim të Demirit dhe Ismailoviqit. Për të njëjtën, sqarim ka kërkuar edhe prokurorja që e përfaqëson lëndën, Fatime Fetai.