Presidenti Stevo Pendarovski sot pranoi letrat kredenciale të ambasadores së sapoemëruar të Republikës Federale të Gjermanisë në Republikën e Maqedonisë së Veriut, Petra Dreksler, transmeton Portalb.mk.
Pendarovski tha se si rezultat i përpjekjeve të përbashkëta, vendi ynë sot sheh në Republikën Federale të Gjermanisë një mik të madh dhe aleat të sinqertë në procesin e realizimit të prioriteteve tona strategjike.
“Një nga këto prioritete strategjike, anëtarësimi i plotë në NATO, tashmë është arritur dhe dy vendet tona janë vende aleate dhe kontribuojnë në realizimin e misionit kyç të NATO-s për garantimin e sigurisë së zonës euroatlantike në kushtet e rrethanave të vështira gjeopolitike “, tha Pendarovski
Në ceremoninë e dorëzimit të letrave kredenciale, siç njoftuan nga Presidenca, ambasadorja Dreksler tha se vizitat e Presidentit Federal, Kancelarit Federal dhe Ministrit të Punëve të Jashtme në muajt e fundit janë shenja të qarta se ne Gjermania është në anën e RMV-së.
“Qeveria federale do të vazhdojë të shoqërojë procesin e anëtarësimit në BE si një partner i besueshëm. Dua t’ju siguroj se gjatë mandatit tim do të investoj të gjithë energjinë time për këtë detyrë. Jemi të vetëdijshëm për kompromiset që u kërkuan kësaj radhe dhe që janë të dhimbshme për shumë njerëz në Maqedoninë e Veriut dhe që janë ende të nevojshme për ndryshimin e nevojshëm kushtetues. Për konsistencën me të cilën vendi juaj po ecën në rrugën e pranimit në BE, ju shprehim mirënjohjen dhe respektin tonë të thellë”, citohet të ketë thënë ambasadorja Dreksler.