Agjencia për Rini dhe Sport ende nuk e ka gati versionin shqip të ueb-faqes, edhe pse para një muaji për Portalb.mk thanë se në mes të shtatorit e njëjta do të lëshohet në përdorim.
Nga Agjencia për Rini dhe Sport, muajin e kaluar informuan për Portalb se u ka arritur donacioni i OSBE-së për ueb faqen e re, e cila do të jetë në tre gjuhë: shqip, maqedonisht dhe anglisht. Sipas Agjencisë, në atë kohë numërimi mbrapsht kishte filluar dhe në një afat prej pesë javësh ueb-faqja do të lëshohet në përdorim, por sot që flasim, ueb-faqja nuk është lëshuar në përdorim.
Portalb kontaktoi me Agjencinë si nëpërmjet emaileve, thirrjeve dhe mesazheve, por përgjigje nuk morëm.
Pyetjet të cilat Portalb i dërgoi te Agjencia për Rini dhe Sport:
- Deri në cilën fazë është përkthimi i ueb-faqes në shqip?
- Herën e fundit që biseduam na thatë se në mes të shtatorit do të jetë gati, pse ende nuk është lëshuar në përdorim?
- Kur do të jetë gati ueb faqja në shqip?
- A janë përkthyer të gjitha dokumentet?
Paraprakisht nga kjo Agjenci thane se kanë përkthyes të punësuar dhe se të njëjtët janë duke punuar në përkthimin e dokumenteve, që sipas tyre janë shumë dokumente për t’u përkthyer.
Ndryshe, edhe pse kanë kaluar dy vite nga hyrja në fuqi e Ligjit për Përdorimin e Gjuhëve në Maqedoninë e Veriut, zbatimi i të njëjtit është shumë i zbehtë në praktikë. Neni 23 i këtij Ligji thotë se “Në afat prej një viti nga dita e hyrjes në fuqi e këtij ligji, të gjitha institucionet kompetente obligohen që t’i miratojnë aktet nënligjore për zbatimin e këtij Ligji”. Megjithatë, lëshime në zbatimin e këtij Ligji vërehen institucionet, si në nivel qendror ashtu edhe në nivel lokal.
- LEXO: Agjencia për Rini dhe Sport thotë se ka arritur donacioni nga OSBE: Pas pesë javësh do të jetë gati ueb-faqja në shqip
- LEXO: Agjencia për Rini dhe Sport ende s’e ka gati ueb-faqen në gjuhën shqipe, pret donacion nga OSBE-ja
- LEXO: As zëvendës drejtorët shqiptar as ligji, nuk kanë arritur të obligojnë Agjencinë për Rini dhe Sport të përktheje ueb faqen
- LEXO: RMV, zbatimi i Ligjit të Gjuhëve sipas dëshirës së institucioneve