Sekretari amerikan i shtetit Xhon Keri sot deklaroi se bisedimeve mes SHBA-së dhe Rusisë për bashkëpunim ushtarak në luftën kundër Shtetit Islamik në Siri i afrohet fundi dhe shprehu pritjet se pas takimit të ekipeve teknike edhe ai do të takohet me shefin e diplomacisë ruse Sergej Lavrov.
Sipas fjalëve të tij, gjatë kësaj jave do të mbahet takim i ekipeve teknike me qëllim që të shqyrtohen hollësirat.
“Ne aktualisht jemi të angazhuar në bisedimet dhe shpresojmë se në këtë ose në ndonjë mënyrë tjetër i afrohemi fundit”, theksoi Keri në konferencën për shtyp gjatë vizitës në Kenia.