Forumi Ndërkombëtar për të Drejtat e Njeriut në Maqedoni (FNDJ), është skandalizuar me dënimet drakoniane që shqiptoi Gjykata e Shkupit, ndaj 6 shqiptarëve, të cilët u akuzuan në procesin e ashtuquajtur “Monstra”, rreth vrasjes së 5 të rinjve maqedonas në Smillkovci të Shkupit, dy vjet më parë.
“Konsiderojmë se ky dënim është marrë me motive politike, e jo gjyqësore, meqë për asnjërin nga të akuzuarit, gjykata nuk ka pasur dëshmi bindëse, veç deklaratave të nxjerra me dhunë nga organet e hetuesisë.
Ky dënim është krejt identik me dënimet e rastit të Sopotit, bombave të Kumanovës, etj., të cilat më vonë u vërtetuan se janë dhënë dënime pa dëshmi.
FNDNJ kërkon urgjentisht kyçjen e mekanizmave dhe institucioneve ndërkombëtare të drejtësisë, gjatë vazhdimit të procesit gjyqësor për rastin ‘Monstra’, në gjykatat e Apelit dhe atë Supreme të Maqedonisë, për të pasur një gjykim korrekt dhe pa paragjykime”, kanë thënë nga ky Forum me kryetar të sajin, Idriz Sinani.