Ka interesim prej qytetarëve për të kontribuar në zbardhjen e rastit të vrasjes së kandidatit për deputetë të Partisë Demokratike të Kosovës nga Komuna e Rahovecit, Elvis Pista.
Sipas zyrtarit për informim të Policisë së Kosovës, Brahim Sadriu, rasti është duke u hetuar, dhe Policia e Kosovës ofron 10 mijë euro shpërblim, për cilindo qytetarë që jep informacione që mund të shpien në zbardhjen e rastit.
“Ka informata prej qytetarëve, por nuk kam kurgjo t’konkretizume për me thanë publikisht… Ka informacione, por duhet të kanalizohen”, shprehet Brahim Sadriu.
Për vrasjen e tij, akoma nuk dihen motivet, edhe pse nuk ka ende asnjë të dyshuar dhe hetimet po vazhdojnë.
Pista ishte 34 vjeçar dhe ishte i vetmi djalë në familje.
Prapa ka lënë dy motra dhe bashkëshorten me të cilën nuk kishte fëmijë, por thuhet se tanimë po priste të bëhej baba.