Fotografia e Putinit i gjunjëzuar dhe duke puthur dorën e Xi Jinping është e rreme
Përveç faktit se një gjest i tillë dorëzimi do të ishte shumë jorealist, kontrolli i fakteve sugjeron se imazhi është krijuar nga një aplikacion i inteligjencës artificiale (AI). Mjetet e inteligjencës artificiale mund të krijojnë imazhe fotorealiste me plot detaje dhe të vështira për t’u dalluar nga imazhet reale, megjithatë ato prodhojnë rregullisht imazhe që përmbajnë gabime, duart dhe veshët janë veçanërisht joreale. Në foto nuk shihet as fytyra e dyshuar e Putinit, e cila është krejtësisht jashtë fotografisë, ndërsa fytyra e presidentit Xi është aq e turbullt saqë dallohet vetëm pak. Një foto e tillë nuk mund të gjendet në bazat e të dhënave të asnjë agjencie lajmesh dhe as prova të qarta që imazhi nuk është krijuar nga softueri i inteligjencës artificiale, shkruan Vërtetëmatësi.
Vërtet Vladimir Putin u ul në një gju dhe i puthi dorën Xi Jinping? Kjo (dez)informatë është publikuar nga ueb portali McToday, ku shfaqet një foto që duket kështu. Por e vërteta është se fotografia, e cila dyshohet se është bërë gjatë udhëtimit të fundit të liderit kinez në Rusi, është fallco.
Vizita e presidentit kinez Xi Jinping në Rusi është bërë një nga titujt botërorë. Vizita vjen në një kohë kur Perëndimi po i bën thirrje Kinës që të distancohet qartë nga Rusia, veçanërisht tani që Gjykata Ndërkombëtare Penale ka lëshuar një urdhër arresti për Putinin.
Pas përfundimit të vizitës, u publikua një foto që u bë virale në rrjetet sociale, ku pretendohej se tregonte presidentin rus Vladimir Putin të gjunjëzuar para presidentit kinez Xi Jinping. Do të ishte një gjest nënshtrimi me shumë simbolikë – nëse imazhi nuk është i rreme.
Kjo foto është publikuar në portalin McToday me titullin “PUTINI NË GJUNJË përballë Xi Jinping, Rusia para Kinës”, e më pas, përveç profilit të tyre në Facebook, është shpërndarë edhe nga një faqe në Facebook ku është bërë virale.
Por kjo nuk është e vërtetë. Putin nuk u gjunjëzua para Xi Jinping, fotoja është e rreme. Përveç faktit se një gjest i tillë dorëzimi do të ishte shumë jorealist, kontrolli i fakteve sugjeron se imazhi është krijuar nga një aplikacion i inteligjencës artificiale (IA).
Një kontroll nga Dojçe Vele tregon se disa detaje të çuditshme në imazh bien në sy.
“Këpuca e pasme e figurës së gjunjëzuar – që pretendohet se është Putin – është në mënyrë disproporcionale e madhe dhe e gjerë. Fleta në të njëjtën këmbë duket e zgjatur. Koka e personit, edhe pse gjysmë e mbuluar, është gjithashtu shumë e madhe dhe jashtë proporcionit me pjesën tjetër të trupit. Veshi është çuditërisht i paformuar dhe ka disa gunga të çuditshme që fotot e tjera të veshit të Putinit nuk i tregojnë. Veshi në kokën e atij që pretendohet se është Xi Jinping duket çuditërisht i deformuar nëse zmadhohet. Duart e këtij njeriu duket se janë të bashkuara. Përvoja tregon se të gjitha këto janë probleme të dukshme që shfaqen në imazhet e krijuara nga IA. Këto janë grafika të krijuara nga aplikacionet me ndihmën e inteligjencës artificiale me qëllim që të duken reale”, analizon Dojçe Vele.
Mjetet e inteligjencës artificiale mund të krijojnë imazhe fotorealiste të mjediseve natyrore dhe njerëzve, të cilat janë plot detaje dhe të vështira për t’u dalluar nga imazhet reale. Sidoqoftë, aplikacionet e IA prodhojnë rregullisht imazhe që përmbajnë gabime, veçanërisht duart dhe veshët që nuk përfaqësohen realisht dhe ky është një nga problemet me të cilat përballen gjeneruesit e imazheve të IA.
Për më tepër, në foto nuk shihet as fytyra e dyshuar e Putinit, që është krejtësisht jashtë fotografisë, ndërsa fytyra e Xi është aq e turbullt saqë dallohet shumë pak.
Një kërkim i fotove zyrtare nga vizita shtetërore e Xi në Rusi tregon gjithashtu se fotografia që është objekt i këtij shqyrtimi është joreale. Në veçanti, ne po kërkonim detaje që mund të ishin të ngjashme me imazhin në fjalë. Në asnjë prej shërbimeve fotografike nuk kemi gjetur ndonjë fotografi që tregon nënshtrimin e pretenduar. Edhe mobiljet e paraqitura në fotot reale të vizitës shtetërore nuk përputhen me atë në foton e falcifikuar.
Fotoja nuk është e firmosur si autor nga asnjë fotograf apo agjenci, thjesht është shpërndarë në rrjetet sociale pa foto të tjera të ngjashme nga ai incident.
Ndonëse ka mundësi që fotografia e shpërndarë në rrjetet sociale të jetë realizuar diku tjetër dhe të mos jetë kapur nga mediat, megjithatë ka shumë gjasa që siguria rreth takimit të dy liderëve të mos lejojë të bëhet një fotografi kaq e çiltër, aq më pak që fototografia të zbulohet në internet.
Fotografia që pretendon se tregon Putinin të gjunjëzuar para Xi Jinping është e rreme. Nuk mund të gjendet në bazat e të dhënave të asnjë agjencie lajmesh dhe as prova të qarta që imazhi nuk është krijuar nga softueri i inteligjencës artificiale.
Meqenëse nuk ka prova të qarta për të konfirmuar prejardhjen e fotografisë, as Putini dhe as Xi Jinping nuk mund të shihen qartë, dhoma e treguar në foto nuk mund të shihet askund në fotografitë zyrtare të takimeve të tyre, dhe fotografia ka një sërë elementesh që fort sugjerojmë se është krijuar nga inteligjenca artificiale, ne e vlerësojmë këtë postim si të pavërtetë.
