Grupet e veshura me të zeza u vunë zjarrin koshave të plehrave dhe hodhën predha ndaj policisë në Paris, e cila u përgjigj me gaz lotsjellës, në margjina të një marshimi kundër presidentit Emmanuel Macron dhe projektligjit të tij thellësisht jopopullor të pensioneve.
Përleshjet shpërthyen gjithashtu në tubime të ngjashme në qytete duke përfshirë Rennes, Bordeaux dhe Toulouse, me një degë banke dhe makina të djegura në Nante, raporton Reuters.
Megjithatë, ndërsa zhgënjimi publik ka evoluar në një ndjenjë më të gjerë anti-Macron, niveli i dhunës të martën nuk ishte aspak afër atij që u pa javën e kaluar dhe tubimet përndryshe ishin kryesisht paqësore, transmeton Klankosova.tv.
Më herët gjatë ditës, qeveria hodhi poshtë një kërkesë të re të sindikatave për të pezulluar dhe rimenduar projektligjin e pensioneve, i cili do të vonojë moshën e pensionit me dy vjet në 64, duke zemëruar krerët e sindikatave që thanë se qeveria duhet të gjejë një rrugëdalje nga kriza.
Qeveria tha se ishte më se e gatshme të fliste me sindikatat, por për tema të tjera, dhe përsëriti se do të qëndronte e vendosur për sa u përket pensioneve.
Miliona njerëz kanë demonstruar dhe u janë bashkuar aksioneve të grevës që nga mesi i janarit për të treguar kundërshtimin e tyre ndaj projektligjit.
Protestat janë intensifikuar që kur qeveria përdori kompetenca të veçanta për ta shtyrë projektligjin në parlament pa votim.
Një protestues në Paris paraqiti gjendjen shpirtërore, duke bartur një pankartë ku shkruhej: “Franca është e zemëruar”.