Kovaçevski-Rue: Me mbështetje nga BERZH-i realizohen projektet kapitale kyçe për zhvillim të përshpejtuar të vendit
Kryeministri i Republikës së Maqedonisë së Veriut, Dimitar Kovaçevski, sot realizoi takim me drejtoreshën e Bankës Botërore për Rindërtim dhe Zhvillim për Evropën Qendrore dhe Lindore, Sharllot Rue dhe shefin e Zyrës së BERZH-it në vend, Andi Aranitasi. Bashkëpunimi i deritanishëm i Republikës së Maqedonisë së Veriut me Bankën Evropiane për Rindërtim dhe Zhvillim ishte në fokus të takimit të sotëm, ku u konfirmuan përkushtimet e të dyja palëve për vazhdimin e bashkëpunimit të suksesshëm edhe në të ardhmen, tranmseton Portalb.mk.
Në takim u diskutua për modernizimin e infrastrukturës rrugore, lidhjen hekurudhore me vendet e rajonit, ndërtimin e infrastrukturës, mbrojtjen e mjedisit, si dhe për energjetikën, ku theks i veçantë u vu në interkonektorin e gazit me Greqinë. Në takim përfaqësuesit e Bankës Evropiane për Rindërtim dhe Zhvillim theksuan përkushtimin e tyre në mbështetjen e realizimit të projekteve për zhvillimin e gjelbër në vend dhe shfrytëzimin e burimeve të ripërtërishme të energjisë.
Kryeministri Kovaçevski, në emër të Qeverisë së Republikës së Maqedonisë së Veriut, shprehu mirënjohjen e tij për mbështetjen e Bankës Evropiane për Rindërtim dhe Zhvillim për realizimin e projekteve në fusha të ndryshme, të cilat mundësojnë përshpejtimin e rritjes ekonomike të vendit, krijimin e një klime të favorshme për investimet e huaja, si dhe përmirësimin e jetës së qytetarëve, me të cilat vendi ecën para në rrugën e integrimit evropian. Në takim, Kryeministri Kovaçevski theksoi se realizimi i projekteve kapitale është prioritet kryesor i Qeverisë. Ai theksoi se BERZH-i është një nga partnerët tanë më të mëdhenj në mbështetjen e realizimit të projekteve nga disa fusha në mbarë vendin që janë vendimtare për përmirësimin e cilësisë së jetës së qytetarëve, por edhe për zhvillimin e ekonomisë. Në takim u theksua se bashkëpunimi me Bankën Evropiane për Rindërtim dhe Zhvillim do të vazhdojë edhe në të ardhmen.
Banka Evropiane për Rindërtim dhe Zhvillim është aktive në Republikën e Maqedonisë së Veriut që nga viti 1993 dhe deri më tani ka miratuar 171 projekte në vend, shumica e të cilave janë të destinuara për projekte në sektorin publik. Është institucioni financiar ndërkombëtar më aktiv që ofron mbështetje për projektet aktuale prej rreth 900 milionë euro, nga të cilat 760.6 milionë euro janë në sektorin e transportit.
Në takim morën pjesë zëvendëskryetari i Qeverisë i ngarkuar për çështje ekonomike, koordinim të resorëve ekonomikë dhe investime, Fatmir Bytyqi, ministri i Financave, Fatmir Besimi dhe drejtori i SHA për kryerjen e veprimtarive energjetike Resurset Nacionale Energjetike Shkup, Bajram Rexhepi.
Kujtojmë se Banka Evropiane për Rindërtim dhe Zhvillim (BERZH) ka siguruar kredi shtetërore prej 55 milionë euro që do të financojë ndërtimin e dy deponive të reja rajonale dhe rehabilitimin e njëdeponie ekzistues, stacione të reja transferimi për mbetjet e ngurta me infrastrukturë të përshtatshme grumbullimi dhe transporti dhe një qendër riciklimi. Dy deponi ilegale do të mbyllen. Projekti do të zbatohet nga Ministria e Mjedisit dhe Planifikimit Hapësinor.
Ky investim parashikon ngritjen e tre sistemeve të integruara rajonale për menaxhimin e mbetjeve sipas standardeve të Bashkimit Evropian (BE), në pesë rajone (Polog, Jugperëndim, Pelagonia, Vardar dhe Juglindje), të cilat do të sigurojnë grumbullimin dhe transportin e mbetjeve për më shumë se një milion qytetarë. Si rezultat i projektit, praktika e depozitimit të mbetjeve të ngurta në deponitë ilegale do të çrrënjoset dhe do të futet një sistem i ri i punës, i cili është i sigurt për mjedisin dhe përputhet me standardet e BE-së.
