Goditja më e madhe për stabilitetin e tregut të energjisë elektrike erdhi pas luftës që filloi Rusia në Ukrainë, tha kryeministri Dimitar Kovaçevski në panel-diskutimin “Transformimi i drejtë social i energjisë së Evropës” në kuadër të Forumit të dytë Socio-ekologjik (FSE), transmeton Portalb.mk.
Sipas tij, për këtë shkak ka pasur mungesë të energjisë në Evropë, veçanërisht gazit natyror, i cili varet edhe nga çmimi i energjisë elektrike dhe furnizimi me energji elektrike.
“Nga një treg i energjisë elektrike i cili për shumë vite ishte treg blerësish, ku blerësit praktikisht thoshin sa u duheshin dhe ata përcaktonin çmimin e energjisë elektrike, tani jemi në treg të shitësve sepse ka mungesë të energjisë elektrike dhe ata e përcaktojnë çmimin normalisht në bursë dhe sa dhe ku do të dorëzohen sasitë”, tha Kovaçevski, njoftoi shërbimi për shtyp i qeverisë.
Në kushte të tilla, ajo që duhet bërë, sipas tij, duhet të bazohet në tre parime, përkatësisht bashkëpunimin, investimin dhe solidaritetin.
Ai përkujtoi se të gjitha vendet në rajon, përveç Bosnjë-Hercegovinës dhe Kroacisë, janë të varura nga importi i energjisë elektrike, që varion nga 17 për qind në 73 për qind në vit.
“Të gjithë prodhojnë energji elektrike nga kapacitetet e vjetra, që janë kapacitete me bazë linjiti, që do të thotë se këtu nuk mund të flasim për ekologji dhe se e vetmja qasje në gaz që kanë është gazi rus. Këto janë të gjitha problemet që i kemi në tavolinë”, tha Kovaçevski.
Nga ana tjetër, shton ai, duhet të sigurohet rrymë për funksionimin e ekonomisë për funksionimin e qytetarëve, me një çmim që mund ta përballojnë edhe qytetarët edhe ekonomia.
Sipas tij, është e nevojshme që të ketë bashkëpunim mes BE-së dhe vendeve të Ballkanit Perëndimor edhe në fushën e investimeve sepse infrastruktura ekzistuese energjetike nuk mund të përdoret më.
“Edhe Rusia, me luftën e saj të pamatur dhe të pajustifikuar në Ukrainë, nuk mund të shesë më energji përmes kësaj infrastrukture, por duhet ta shesë në lindje, ku nuk ka infrastrukturë. Tani ata do të duhet të ndërtojnë infrastrukturë në lindje, në Kinë, Pakistan…”, thotë Kovaçevski, duke shtuar se “meqë nuk kemi infrastrukturë lindje-perëndim, duhet të ndërtojmë infrastrukturë jug-veri, veri-jug dhe perëndim-lindje.”
“Ajo infrastrukturë nuk mund të ndërtohet brenda dy vjetësh sepse përfshin investime miliarda euro. Por kjo mund të bëhet më shpejt nëse punojmë së bashku”, tha kryeministri Kovaçevski.
Në forum morën pjesë Martin Schulz, kryetari i Fondacionit “Friedrich Ebert” dhe ish-president i Parlamentit Evropian, kryeministri i Kosovës, Albin Kurti, ministrja e Punëve të Jashtme të Suedisë, Anne Linde dhe Hristina Spasevska, prorektore e Universitetit “Shën Kirili dhe Metodi”. Forumi organizohet nga Fondacioni “Friedrich Ebert”, Qendra Ndërkombëtare “Olof Palme” dhe Progres – Instituti për Demokraci Sociale.