Presidenti Stevo Pendarovski sot pranoi letrat kredenciale të ambasadores së sapoemëruar të Shteteve të Bashkuara të Amerikës në Republikën e Maqedonisë së Veriut, Angela Price Ageler, transmeton Portalb.mk.
Pendarovski i uroi ambasadores së re mirëseardhje dhe i dëshiroi suksese në kryerjen e funksionit të saj përgjegjës.
“Fakti që ky nuk është qëndrimi juaj i parë diplomatik në Shkup dhe se jeni njohëse e shkëlqyer i situatës në vendin tonë, është një supozim domethënës për pasurimin e mëtejshëm të marrëdhënieve dypalëshe. Të jeni e sigurt se në kryerjen e detyrave tuaja diplomatike do të gëzoni mbështetjen time dhe të gjithë ekipit tim”, tha Pendarovski.
Ai theksoi se Republika e Maqedonisë së Veriut vazhdimisht i kushton vëmendje të veçantë zhvillimit të marrëdhënieve miqësore dhe bashkëpunimit dypalësh me Shtetet e Bashkuara të Amerikës, të cilat, siç tha ai, i konsiderojmë mik të madh, partner të rëndësishëm ekonomik dhe përkrahës të sinqertë në momentet më të vështira që nga pavarësia jonë.
“Përmirësimi i vazhdueshëm i marrëdhënieve tona është një aksiomë politike e jashtme, e cila është prioritet i të gjithë faktorëve relevantë politikë në Maqedoninë e Veriut. Më gëzon veçanërisht fakti që në periudhën e kaluar ne kemi ndërtuar dhe përmirësuar marrëdhëniet dypalëshe midis vendeve tona si aleate në Aleancën e NATO-s, duke ndarë vlerat e përbashkëta të demokracisë, lirisë dhe të drejtave të njeriut, si dhe angazhimin për një rend ndërkombëtar i bazuar në rregulla. Në kontekstin e sfidave të fundit gjeopolitike dhe agresionit ushtarak rus kundër Ukrainës, më lejoni të deklaroj se miqësia jonë e fortë fiton edhe më shumë rëndësi dhe është një garanci për stabilitetin dhe prosperitetin e vendit tim dhe të rajonit të Ballkanit Perëndimor, në tërësi”, tha Pendarovski.
Ambasadorja e re nga ana tjetër dha zotimin e saj se do të qëndrojë krah për krah me popullin e këtij vendi ndërsa vendi realizon qëllimet e tij për paqen, prosperitetin, sigurinë dhe pavarësinë për të gjithë qytetarët e tij.
“Evropa po përballet me kërcënimin më të madh, të ngjashëm me të cilin nuk është parë për breza, dhe Maqedonia e Veriut, si një aleat i besueshëm, aktiv në NATO, kontribuon për sigurinë dhe stabilitetin në Evropë. Për më shumë se 30 vjet ne kemi punuar së bashku për të siguruar vendin e merituar të Maqedonisë së Veriut në komunitetin më të madh evropian, duke mbështetur vlerat thelbësore të një demokracie të lulëzuar – respektin për sundimin e ligjit, mundësi të barabarta për drejtësi, rritje ekonomike, si dhe përmes angazhimit për arritjen e këtyre qëllimeve në mënyrë të hapur dhe transparente. Maqedonia e Veriut po përballet me sfida në themelet e të gjitha këtyre shtyllave. Ndërsa vazhdoni të ecni përpara, Shtetet e Bashkuara do të jenë këtu si një partner, aleat dhe mik, duke ushqyer një marrëdhënie që do të bëhet më e fortë, më e thellë dhe më produktive”, tha ambasadorja Angela Price Ageler.