Presidenti i Turqisë, Recep Tayyip Erdogan, zhvilloi bisedë telefonike me presidentin rus Vladimir Putin, transmeton Anadolu Agency (AA).
Sipas njoftimit të Drejtorisë së Komunikimeve të Presidencës turke, në bisedë janë diskutuar zhvillimet e fundit në lidhje me luftën Rusi-Ukrainë.
Presidenti Erdogan ka shprehur kënaqësinë e tij për përfundimin me sukses të shkëmbimit të të burgosurve Rusi-Ukrainë me ndërmjetësimin e Turqisë-s, si dhe për funksionimin e Marrëveshjes së Stambollit, të realizuar me mbështetjen e Kombeve të Bashkuara.
Erdogan ka deklaruar se zgjatja e mekanizmit, që do të skadojë në nëntor, është në interes të përbashkët, duke shtuar se po vazhdojnë të punojnë në lidhje me eksportin e pandërprerë të plehrave dhe drithërave ruse.
Presidenti turk ka thënë se nevojiten hapa për uljen e tensioneve për t’i hapur rrugën zhvillimeve më pozitive dhe se nga Rusia pritet të ndërmarrë hapa për të lehtësuar këtë proces, veçanërisht lidhur me çështjen e aneksimit të disa rajoneve të Ukrainës.
Duke i kërkuar presidentit rus Putin që t’u japë një tjetër mundësi negociatave, Erdogan ka theksuar se janë të gatshëm të luajnë një rol lehtësues në këtë proces.