Agjencia ndërkombëtare për hulumtimin e kancerit, autoritet kryesor në këtë fushë, ka arritur në përfundimin se shtimi në peshë është faktor rreziku, shkaktar për kancerin e tiroides. Dr. Marit Laxonsen zbuloi se një në pesë kancere të tiroides në të ardhmen mund t’i atribuohet niveleve aktuale të mbipeshës dhe obezitetit, shkruan Panacea.
MË I ZAKONSHËM TEK GRATË
Kanceri i tiroides është një nga kanceret e paktë që është 2-3 herë më i zakonshëm tek femrat sesa tek meshkujt, por studimi zbuloi se rreziku i kancerit të tiroides që i atribuohet mbipeshës ose obezitetit është më i lartë tek meshkujt sesa tek femrat. Edhe pse ende nuk është shpjeguar mirë se çfarë e shkakton ndryshimin gjinor në rrezikun e kancerit të tiroides që lidhet me mbipeshën, të qenit mbipeshë ose obez mendohet se shpjegon dy nga pesë kanceret e tiroides tek meshkujt dhe një në dhjetë kancere të tiroides tek femrat.
CILAT JANË SIMPTOMAT
Në fazat e hershme, pothuajse nuk ka simptoma, ndërsa me zhvillimin e kancerit, ato mund të shfaqen:
- nyje në qafë – disa janë të dukshme, ndërsa disa mund të ndjehen nëpërmjet prekjes. Disa njerëz mund të vërejnë siklet gjatë gëlltitjes (zakonisht në pjesën e përparme të qafës)
- nyjet limfatike të zmadhuara në qafë – zakonisht në zonën poshtë nofullës.
- dhimbje qafe që nganjëherë shtrihet deri në vesh – nëse zgjat më shumë se disa javë, veçanërisht në kombinim me disa simptoma të tjera, drejtohuni tek mjeku.
- ngjirja e zërit ose ndryshime të tjera në zë
- vështirësi në frymëmarrje dhe/ose gëlltitje
- kolla e vazhdueshme – nuk shkaktohet nga ftohja ose sëmundje tjetër.