Rusia ka rekrutuar mercenarë për të mbajtur pjesë të vijës së frontit në Ukrainë, duke treguar mungesë të këmbësorisë luftarake, thotë një raport i ri i Ministrisë britanike të Mbrojtjes, ndërsa ushtria ukrainase ndërmerr një kundërofensivë në jug, transmeton Portalb.mk.
Rritja e mbështetjes ditore nga ushtarët me pagesë nga kompania private ushtarake ruse Wagner, të cilët deri më tani janë përdorur kryesisht për operacione speciale, është një tjetër shenjë se ushtria ruse është e rraskapitur pas më shumë se pesë muajsh luftime në Ukrainë. Sidoqoftë, britanikët vërejnë se mercenarët Wagner nuk do të mund të kompensojnë humbjet e njësive të rregullta të këmbësorisë ose të ndryshojnë rrjedhën e pushtimit.
“Ky është një ndryshim i rëndësishëm i angazhimeve të mëparshme të grupit që nga viti 2015, kur ata zakonisht shkonin në misione të tjera përveç operacioneve të hapura, të rregullta ushtarake ruse në shkallë të gjerë”, thuhet në raportin britanik.
Kievi tha se po vëzhgon një rishpërndarje masive të forcave ruse në jug pasi ushtria ruse, e vendosur në perëndim të lumit Dnieper, u bë shumë e cenueshme pas sulmeve të fundit me raketa në urat strategjike në Kherson. Britanikët thonë se qyteti i Kherson tani është praktikisht i shkëputur nga pjesa tjetër e rajonit me të njëjtin emër.