U arrestua burri nga Velesi, rrahu një bashkëqytetar i cili nga plagët e marra vdiq
Ministria e Punëve të Brendshme (MPB) njofton se një burrë nga Velesi është arrestuar për shkak se dyshohet se ka rrahur një burrë tjetër nga Velesi, i cili më pas nga plagët e marra ka ndërruar jetë, transmeton Portalb.mk.
“Pas masave dhe aktiviteteve dhe koordinimit të SPB Veles, SPB Strumicë dhe Prokurorisë Themelore Publike Veles, me datë 14.07.2022 në ora 22:45 në vendin e quajtur “Stara Mrdaja” në Dojranin e Vjetër, zyrtarët policorë nga SPB Gjevgjeli kanë privuar nga liria G.S. (43) nga Velesi. Ai dyshohet se më 09.07.2022 në një kazino në Veles e ka sulmuar dhe lënduar D.V.(46) nga Velesi, i cili ka ndërruar jetë më 13.07.2022 në Spitalin e Përgjithshëm në Veles”, njoftoi MPB.
Nga Ministria shtojnë se pas masave të marra, u konstatua se më datë 07.09.2022, D.V. me lëndime është dërguar në spitalin e Velesit dhe në një bisedë zyrtare me zyrtarët policorë ka deklaruar se nuk i kujtohet se si i ka marrë lëndimet, e më pas me iniciativë është larguar nga spitali.
“Më datë 13.07.2022 është gjetur në shtëpinë e tij në gjendje të rëndë dhe është transportuar sërish për në spital ku edhe ka ndërruar jetë. Me urdhër të prokurorit publik është kryer autopsia e trupit dhe është konstatuar se vdekja ka ndodhur si pasojë e lëndimeve të marra”, thonë nga Policia.
Pas marrjes së masave, kryerjes së bisedave me disa persona, si dhe këqyrjes së kamerave të sigurisë nga kazinoja, u zbulua se autori i krimit ishte G.Sh, i cili u gjet dhe u privua nga liria në Dojran.
Policia thekson se pas dokumentimit të plotë të rastit dhe në koordinim me Prokurorinë Themelore Publike Veles, kundër tij do të bëhet kallëzim penal përkatës.
