Në Maqedoninë e Veriut është ulur numri i lindjeve, 20 foshnja vijnë nga nënat nën 15 vjeç

Gjatë vitit të kaluar në Maqedoninë e Veriut ka pasur gjithsej 18 648 lindje të gjalla, numër i cili është më i vogël se vitin e kaluar, transmeton Portalb.mk.

“Kanë lindur gjithsej 18 790 foshnje, prej të cilëve 18 648 foshnje të gjalla, ndërsa 142 foshnje të vdekura. Numri i foshnjave të lindura të gjalla gjatë vitit 2021, krahasuar me vitin paraprak, është zvogëluar për 2.0%”, raporton Enti Shtetëror i Statistikave.

Më shumë foshnje kemi të gjinisë mashkullore, ndërsa më shumë lindje ka në muajin korrik.

“Sipas moshës së nënës, pjesëmarrje më të madhe, përkatësisht 34,0% kanë foshnjet e gjalla të lindura nga nënat e moshës prej 25 deri 29 vjeç. Mosha mesatare e nënave gjatë numrit të përgjithshëm të lindjeve është 29.2 vjeç ndërsa te lindjet e para është 27.5 vjeç”, raporton Enti.

Enti ka sqaruar që gjatë vitit 2021 janë të evidentuara edhe 20 foshnje të lindura nga nëna të moshës nën 15 vjeç.