Në qendër të Shkupit sot është vendosur instalacioni artistik “Duke pritur Godon”, kushtuar qëndrimit të Bashkimit Evropian ndaj Republikës së Maqedonisë së Veriut. Aksioni gueril është pjesë e projektit “Artivator” të Qendrës së arteve bashkëkohore, transmeton Portalb.mk.
“Frymëzimi për këtë vaksion vjen nga ngjashmëria e situatës në dramën “Waiting for Godot” të Samuel Beckett dhe procesit të integrimit evropian të RMV-së. Edhe pse në pamje të parë mund të tingëllojë joserioze, qesharake dhe absurde, megjithatë ekzistojnë ngjashmëri të mëdha mes dy veprimeve – atij në dramën e Beketit dhe atij në shtetin e Maqedonisë në rrugën e saj drejt integrimeve evropiane”, thonë organizatorët.
Autorët theksojnë se ashtu si personazhet kryesore të dramës së Beketit, Vladimiri dhe Estragoni, presin me orë e ditë që Godo të vijë dhe t’u sqarojë dilemat dhe t’u zgjidhë problemet, ashtu edhe Maqedonia pret fillimin e negociatave, datën e negociatave, konferencë ndërqeveritare, me shpresën se kur të vijë BE-ja të gjitha problemet do të zgjidhen me shkop magjik.