Në një ceremoni me nderimet më të larta shtetërore dhe ushtarake, presidenti Stevo Pendarovski sot priti Presidentin e Republikës së Letonisë Egils Levic, i cili po qëndron për vizitë zyrtare në Republikën e Maqedonisë së Veriut, transmeton Portalb.mk.
Të dy presidentët zhvilluan takim tete-a-tete, pasuar nga një takim plenar i dy delegacioneve.
Bisedimet fokusohen në marrëdhëniet dypalëshe, politikën e zgjerimit të BE-së, sfidat e sigurisë në fqinjësinë e gjerë në kontekstin e pushtimit ushtarak rus të Ukrainës dhe çështje të tjera aktuale gjeopolitike.
Presidenti Pendarovski falënderoi për mbështetjen e vazhdueshme dhe parimore të Letonisë për realizimin e prioriteteve të politikës së jashtme të vendit, duke i përmendur vendet baltike si shembull të shkëlqyer për transformimin e shoqërive përmes procesit të integrimeve evropiane. Integrimi euro-atlantik në Ballkanin Perëndimor sjell siguri të barabartë për kontinentin, siç është rasti me rajonin e Baltikut, tha Pendarovski.
Pas mbledhjes plenare të delegacioneve, është paraparë që të dy presidentët të mbajnë konferencë të përbashkët për shtyp.
Edhe kryetari i Qeverisë së Republikës së Maqedonisë së Veriut, Dimitar Kovaçevski, u takua me Levits. Kovaçevski në takim theksoi se vizita e tij në Maqedoninë e Veriut është hap më shumë drejt avancimit të mëtejshëm të lidhjeve dypalëshe mes të dyja vendeve.
Në takim ku morën pjesë edhe zëvendëskryetarja e Qeverisë e ngarkuar për politika për qeverisje të mirë, Sllavica Gërkovska dhe ministrja e Mbrojtjes Sllavjanka Petrovska, u theksua se nga vendosja e marrëdhënieve diplomatike para 26 viteve, dy vendet kanë marrëdhënie jashtëzakonisht miqësore dhe të ngushta me fokus të fuqishëm në dinamizimin e dialogut politik dhe shkëmbimit tregtar.
“Në bisedën me presidentin Levits, kryeministri Kovaçevski theksoi se Maqedonia e Veriut vlerëson qëndrimin e Letonisë që është vital procesi i integrimit evropian të Maqedonisë së Veriut të vazhdohet me mbajtjen e Konferencës Ndërqeveritare sa më shpejtë të jetë e mundur dhe se çështjet me Bullgarinë duhet të zgjidhen përmes dialogut dhe mirëkuptimit, jashtë procesit aderues. Presidenti i Republikës së Letonisë Egils Levits theksoi në takim se anëtarësimi i Ballkanit Perëndimor në BE është një çështje e qëndrueshmërisë gjeopolitike për vetë BE-në në kohën dhe rrethanat e shkaktuara nga pushtimi rus në Ukrainë”, thuhet në kumtesën e Qeverisë.
Temë bisedimi mes kryeministrit Kovaçevski dhe presidentit Levits ishte lufta në Ukrainë, për të cilën u theksua se është shkelje brutale e së drejtës ndërkombëtare dhe agresion i paprovokuar ushtarak nga Rusia ndaj një shteti sovran dhe se diplomacia dhe dialogu janë të nevojshme për ndërprerjen e veprimtarive ushtarake.