Shkolla e lartë për sigurim dhe financa nga Bullgaria nënshkroi memorandume bashkëpunimi me universitetet private në Maqedoninë e Veriut – Universiteti-FON, Shkup, Universiteti Kolgeji amerikan Shkup dhe Universiteti i Evropës Juglindore, Tetovë, transmeton Portalb.mk.
Siç njofton MIA nga Sofja, memorandumet parashikojnë bashkëpunim akademik, zhvillim të planprogrameve të përbashkëta përmes të cilave studentët nga Maqedonia e Veriut dhe Bullgaria do të mund të marrin diploma të dyfishta.
Bashkëpunimi do të ofrojë mundësi të reja rajonale për marrjen e studimeve të doktoratës, masterit dhe studimeve diplomike në ekonomi, biznes dhe sipërmarrje.
Gjatë bisedave mes rektorit të Shkollës lartë për sigurim dhe financa prof. Boris Velçev dhe rektorët e tre universiteteve në Republikën e Maqedonisë së Veriut ranë dakord që të aplikojnë praktikën e mobilitetit të studentëve për të studiuar jashtë vendit dhe të kryejnë shkëmbim të afërt me materiale shkencore, publikime dhe informacione në interes të studentëve.
Siç informoi MIA, Shkolla e lartë për sigurim dhe financa është universiteti i parë privat bullgar i specializuar në biznes, financa, sigurime, menaxhim, marketing dhe sipërmarrje.