Zyrtarë policor në pikën kufitare kanë marrë ryshfet nga shtetasit shqiptarë që kanë kaluar kufirin, informoi Ministrinë e Punëve të Brendshme dhe njoftoi se po punohet për sanksionimin e autorëve, transmeton Portalb.mk.
“Reparti për kontroll të brendshëm në koordinim me prokurorinë kompetente që nga mbrëmja e djeshme është duke punuar intensivisht për zbardhjen dhe sanksionimin e rastit të ryshfetit nga ana e zyrtarëve policorë në vendkalimin kufitar Bllacë. Pas zbardhjes së rastit dhe sanksionimit të autorëve do ta informojmë publikun në mënyrë adekuate”, thuhet në njoftimin e MPB-së.
Ndrkohë, zëvendësministri për Punë të Brendshme, Nazim Bushi, ka konfirmuar për TV21 se është arrestuar shefi i turnit në pikëkalimin Bllacë, i cili u kap me kamerë të fshehtë duke kërkuar nga 20 euro për pasagjerët shqiptarë që hynin në Maqedoninë e Veriut.
“Menjëherë pas marrjes së lajmit, kontrolli i brendshëm e ka arrestuar”, konfirmoi zëvendësministri, transmeton TV21.
Mësohet se i arrestuari i parë është E.Sh nga Shkupi, shef turni në pikëkalimin mes RMV-së dhe Kosovës, ndërsa zyrtari tjetër policor që duket në video mësohet se është Z.R.
Skandali u zbulua pasi një biznesmen, që merret me transport udhëtarësh denoncoi në emisionin “Stop” në TV Klan Shqipëri, presionin që i bëhet duke i kërkuar ryshfet për një shërbim që duhet të ishte falas dhe që i takon në kufi.