Qeveria polake ka lëshuar një udhëzues se si të bëhen përgatitje për raste krizash, siç është lufta, raporton Koha.net. Ai udhëzon publikun se çfarë duhet të bëjë gjatë sulmeve me armë, që variojnë nga konvencionale në kimike dhe bërthamore, si dhe përshkruan sistemet e paralajmërimit publik që do të përdoren në ngjarje të tilla, raporton Sky News të mërkurën.
Udhëzuesi këshillon njerëzit që të rezervojnë ujë, ushqim, ilaçe, bateri dhe pishtarë në rast të ndërprerjeve të energjisë.
Edhe pse qeveria polake ka thënë se është e detyruar të përgatisë publikun për skenarë të ndryshëm, ajo mohoi se udhëzuesi kishte ndonjë lidhje me luftën në Ukrainë. Udhëzuesit e mëparshëm kishin përfshirë situata të tilla si përmbytjet dhe moti i ashpër i dimrit.
Megjithatë, kërcënimi i pushtimit rus mund të jetë në mendjen e disave në Poloni, e cila ndan një kufi me Ukrainën.
Ndërsa Rusia i ka përqendruar kryesisht përpjekjet e saj të luftës në Ukrainën veriore, jugore dhe lindore, ajo ka kryer bombardime edhe në qytetin perëndimor të Lviv – rreth 69 km nga kufiri polak.
Nuk ka asnjë informacion specifik se Rusia po planifikon një sulm ndaj Polonisë, ose se Polonia po pret një të tillë, por ka frikë se Rusia mund të përpiqet të zgjerojë pushtimin e saj në vendet fqinje.