Gjermania do të sigurojë 200 milionë euro shtesë në ndihmë humanitare për Afganistanin, njoftoi Ministrja e Jashtme, Annalena Baerbock të enjten (31 mars), transmeton REL.
Kriza humanitare që po përjeton popullsia afgane është një nga më të rëndat në botë, tha Baerbock.
Në të njëjtën kohë, ajo u bëri thirrje talibanëve që janë momentalisht në pushtet që të ofrojnë qasje të papenguar për punonjësit e ndihmës humanitare dhe të garantojnë sigurinë e tyre.
Ajo tha se ishte e papranueshme që Programi Botëror i Ushqimit i OKB-së (WFP), për shembull, nuk ishte aktualisht në gjendje të furnizonte provincat e Kabulit, Kandaharit dhe Ghor-it me ushqim për të shpëtuar jetë.
Ajo u bëri thirrje gjithashtu atyre që të ofrojnë qasje të barabartë në arsim në të gjithë vendin.
Shkollat e mesme janë të mbyllura për vajzat në Afganistan.
“Gjendja e vështirë e vajzave ilustron vuajtjet e njerëzve në Afganistan”, tha Baerbock.
Përkushtimi i Gjermanisë përtej ndihmës humanitare vazhdon të varet nga veprimet e qeverisë talebane, shtoi ministrja e jashtme gjermane.
“Berlini pret respekt për të drejtat e njeriut, formimin e një qeverie gjithëpërfshirëse dhe veprim kundër terrorizmit”, tha ajo.