Administrata e presidentit amerikan, Joe Biden ka prezantuar sanksione të reja kundër oligarkëve rusë dhe personave tjerë të rrethit të ngushtë të presidentit rus, Vladimir Putin, si përgjigje ndaj sulmit rus në Ukrainë, shkruan REL.
Në mesin e të shënjestruarve janë:
- Zëdhënësi i Kremlinit, Dmitry Peskov dhe
- Alisher Burhanovich Usmanov, një nga individët më të pasur në Rusi dhe aleat i Putinit
Departamenti amerikan i Shtetit ka njoftuar se do të vendosë ndalesë në viza për 19 oligarkë rusë dhe dhjetëra anëtarë të familjeve të tyre.
“Qëllimi është që të maksimizohet ndikimi mbi Putinin dhe Rusinë dhe të minimizohet dëmi ndaj nesh dhe aleatëve tanë në gjithë botën”, ka thënë Biden, në fillim të takimit që ka zhvilluar me kabinetin e tij dhe nënpresidenten, Kamala Harris.
Shtëpia e Bardhë ka thënë se oligarkët dhe dhjetëra familjarë të tyre do të përjashtohen nga sistemi financiar amerikan.
Asetet e tyre në SHBA do të bllokohen dhe pronat e tyre nuk do të mund të përdoren.
Shtëpia e Bardhë e ka përshkruar Peskovin si “shitës kyç të propagandës ruse”.