NATO pa pritshmëri të mëdha nga bisedimet me Rusinë

Sekretari i Përgjithshëm i NATO-s, Jens Stoltenberg, nuk shprehu optimizëm sot për ndonjë përparim të konsiderueshëm në bisedimet mes Shteteve të Bashkuara dhe Rusisë. Por ai tha se megjithëse negociatat që kanë në qendër zbutjen e tensioneve lidhur me Ukrainën mund të mos i zgjidhin të gjitha çështjet, ato mund të ofrojnë një rrugë për të shmangur konfliktin, transmeton VOA.

Stoltenberg foli ndërsa zyrtarët amerikanë dhe rusë po mbajnë bisedime në Gjenevë, në fillim të një jave me aktivitet intensiv diplomatik të Perëndimit me Moskën.

“Nuk mendoj se duhet të presim që këto takime t’i zgjidhin të gjitha çështjet. Shpresa jonë është, që të mund të biem dakord për një rrugë përpara, që të mund të biem dakord për takime të mëtejshme, që mund të biem dakord për një proces”, tha Stoltenberg.

Ai foli në një konferencë të përbashkët shtypi me zëvendëskryeministren e Ukrainës, Olga Stefanishyna.

Shtetet e Bashkuara dhe NATO-ja shpresojnë që me bisedimet e kësaj jave, të arrijnë të shmangin rrezikun e një pushtimi të ri rus në Ukrainë.

Rusia ka paraqitur kërkesa sigurie, mes së cilave premtimin që aleanca të mos vazhdojë të zgjerohet në Evropën Lindore. Stoltenberg e bëri të qartë që kjo është e papranueshme.

“E kemi thënë shumë qartë se nuk do të bëjmë kurrë kompromis përsa i takon të drejtës së çdo vendi në Evropë për të zgjedhur rrugën e vet, përfshirë marrëveshjet e sigurisë tek të cilat do që të marrë pjesë”, tha ai.

Zëvendës kryeministrja ukrainase, Stefanishyna tha se “agresori nuk mund të vendosë kushte derisa tanket ruse të jenë larguar nga kufiri me Ukrainën”.

“Ne e shohim këtë si përpjekje të Rusisë për ta ndryshuar rrjedhën e diskutimeve, duke kërcënuar me një luftë të re, pa bërë asnjë hap drejt një zgjidhjeje paqësore sipas fornateve të Minskut dhe Normandisë. Rusia po përpiqet tp imponojë axhendën e vet, në vend që të kthehet në tryezën e bisedimeve”, tha ajo.

Bisedimet SHBA-Rusi në Gjenevë do të pasohen nga një takim i Këshillit NATO-Rusi në Bruksel më 12 janar dhe bisedime në kuadrin e Organizatës për Bashkëpunim dhe Siguri në Evropë (OSBE) në Vjenë më 13 janar.

Lajme të ngjashme

Leave a Reply

Your email address will not be published. Required fields are marked *

Back to top button