George Floyd u arrestua me dyshimin se ka përdorur kartëmonedha të falsifikuara prej 20 dollarësh
Ish-oficeri i policisë së Minneapolis, Derek Chauvin, pranoi sot se ka shkelur të drejtat civile të afrikano-amerikanit George Floyd në arrestimin që përfundoi me vdekjen e tij, pasi u deklarua i pafajshëm në shtator për atë akuzë, transmeton 360 Shkallë.
Chauvin, 45 vjeç, u dënua në qershor me 22 vjet e gjysmë burg për vdekjen e George Floyd. Por ai përballet me dënim maksimal me burgim të përjetshëm, megjithëse prokurorët mund të kërkojnë një dënim më të lehtë për shkak se ai u deklarua fajtor.
George Floyd vdiq gjatë arrestimit pasi Chauvin i shtypi qafën me gju për nëntë minuta, gjë që u regjistrua nga një kalimtar i rastit në telefonin e tij celular. Incidenti tronditi botën dhe shkaktoi një nga lëvizjet më të mëdha të protestës në Shtetet e Bashkuara në dekada.
Chauvin dhe tre oficerë të tjerë policie, Thomas Lane, J. Alexander Kueng dhe Tu Tao arrestuan Floyd-in me dyshimin se kishte përdorur një kartëmonedhë të falsifikuar prej 20 dollarësh.
Lane, Kueng dhe Tao janë akuzuar në një gjykatë shtetërore për ndihmë dhe nxitje në vrasjen e tij dhe gjyqi i tyre do të fillojë në mars.
Me përjashtim të nivelit shtetëror, të katër akuzohen në nivel federal se i mohuan Floydit të drejtat e tij civile për dështimin për t’i ofruar atij kujdes mjekësor.
Chauvin akuzohet gjithashtu në nivel federal për shkelje të së drejtës së Floyd për të mos u arrestuar padrejtësisht me përdorimin e forcës së tepruar. Tao dhe Kueng akuzohen në nivel federal se kanë shkelur të drejtën e Floyd-it për të mos u arrestuar padrejtësisht duke mos ndërhyrë dhe larguar Chauvin-in derisa gjunjëzohej në qafën e Floyd.