Analizë profesionale: Pse personat e rivaksinuar mund të infektohen me Kovid-19?

Javët e fundit kemi dëgjuar gjithnjë e më shumë raste të shpërthimit të virusit – mes miqve të miqve, personazheve të famshëm, politikanëve…, njerëzve që rezultojnë pozitivë pasi testohen, edhe pse janë vaksinuar plotësisht. Disa prej tyre shfaqin simptoma të COVID-19, por në pjesën më të madhe simptoma të lehta, shkruan Panacea.

Instituti Robert Koch në Gjermani ka regjistruar më shumë se 117,000 raste të depërtimit të virusit dhe infeksioneve simptomatike që nga fillimi i vaksinimit në shkurt. Ekspertët nuk e shpjegojnë këtë në asnjë mënyrë me joefektivitetin e vaksinave, të cilat vazhdojnë të ofrojnë mbrojtje të shkëlqyer kundër simptomave të rënda, edhe nëse do të nevojiteshin doza “përforcuese” për të ruajtur atë nivel mbrojtjeje.

“Duhet të dini se mbrojtja kundër infeksionit, gjashtë muaj pas vaksinimit, nuk është më aq e fortë”, tha virologu gjerman Hendrik Strek.

Me të është dakord edhe Leif Sander, shkencëtar në Departamentin e sëmundjeve infektive dhe mjekësisë respiratore në Spitalin Gjerman Charite.

MBROJTJA NGA SËMUNDJET E RËDA

Mbrojtja është më e fortë dy javë pas marrjes së dozës së dytë të vaksinës dhe më pas zvogëlohet ngadalë, shpjegon Sander. Por është e rëndësishme të theksohet se niveli i mbrojtjes për personat e vaksinuar do të jetë gjithmonë shumë më i lartë se për personat e pavaksinuar, shtoi ai.

Komuniteti shkencor nuk është aspak i befasuar nga zhvillime të tilla. Virologu kryesor gjerman Christian Drosten tha në prill se njerëzit e vaksinuar mund të kontribuojnë në përhapjen e virusit brenda disa muajsh. Por virologu Strek thotë se është shumë më e rëndësishme që një person të mbrohet nga simptomat më të rënda të sëmundjes që lejon vaksinimin, sesa të kursehet nga riinfeksioni. Ai shton se ata që sëmuren pavarësisht vaksinimit shpesh shfaqin simptoma të lehta, ndërsa te disa persona të vaksinuar mungojnë plotësisht.

TRANSMETIMI I VIRUSIT

Mundësia e transmetimit të virusit gjithashtu ndryshon midis personave të vaksinuar dhe të pavaksinuar.

“Sasia e virusit në trupin e personit të vaksinuar zvogëlohet shumë më shpejt, ndërsa vaksina në fakt shkurton periudhën gjatë së cilës virusi mund të transmetohet”, shpjegon Strek.

Shpërbërja e virusit mund të jetë e rrezikshme tek njerëzit e moshuar, përgjigja imune e të cilëve është më e dobët. Sipas Institutit Gjerman, 1076 persona të vaksinuar kanë vdekur në Gjermani që nga shkurti nga COVID-19. Është e rëndësishme të theksohet se në mesin e tyre, 72% ishin më të vjetër se 80 vjeç.

“Kjo tregon një rrezik përgjithësisht më të lartë të vdekjes në këtë grupmoshë, pavarësisht nga efektiviteti i vaksinës”, tha Instituti Robert Koch. Duke parë numrin total të pacientëve, “vetëm një pjesë e vogël e atyre të shtruarve në spital që po trajtohen në njësinë e kujdesit intensiv ose që kanë vdekur mund t’i atribuohet një depërtimi virusi”, thanë ekspertët e institutit.

Një deklaratë nga Instituti Robert Koch tha se rritja e depërtimeve ishte “e parashikueshme” pasi gjithnjë e më shumë njerëz u vaksinuan, ndërsa masat kufizuese u lehtësuan, duke rritur gjasat që njerëzit e vaksinuar plotësisht të vijnë në kontakt me virusin.

Sander propozon dozën “përforcuese” t’i ofrohet të gjithëve, pavarësisht nga mosha, gjashtë muaj pas vaksinimit me dozën e dytë dhe beson se kjo do të kishte efekt “dumping” në përhapjen e virusit në popullatë. Ai citon përvojën në Izrael, ku falë “përforcuesve”, vendi është rikuperuar nga vala e fundit e virusit.

Nga ana tjetër, Strek nuk është edhe aq mbështetës i dozës së tretë të vaksinës. Ai thekson se nuk ka vaksina të mjaftueshme globalisht dhe beson se është më e rëndësishme që më shumë vende në botë të marrin një dozë të dytë të vaksinës sesa të nxitojnë në një të tretën në ato vende më të pasura. Ai beson se do të ishte më mirë për sistemet shëndetësore që të vaksinojnë personat mbi 60 vjeç me dy doza, sesa njerëzit në të njëzetat me një dozë të tretë.

Lajme të ngjashme

Leave a Reply

Your email address will not be published. Required fields are marked *

Back to top button