Ministri Nuredini: problematika e mbeturinave nuk është vetëm në Tetovë, por në të gjithë shtetin

Fisnik Xhelili

3 years ago

Naser Nuredini, Teuta Arifi, foto: Portalb.mk/Fisnik Xhelili

Keqmenaxhimi me mbeturinat është një nga problemet më të mëdha të qytetit të Tetovës ndër vite. Autoritetet ende nuk kanë gjetur një zgjidhje gjithëpërfshirëse dhe efikase për menaxhimin e mbeturinave. Mbeturina të shumta të grumbulluara në çdo cep të qytetit krijojnë mbi dhjetëra deponi të vogla në qytetin e Tetovës, madje në disa raste bllokojnë edhe trotuaret për kalimin e këmbësorëve. Gjendja ka qenë më kritike gjatë muajit të fundit kur edhe u shtua numri i qytetarëve me ardhjen e mërgimtarëve, dhe gjatë kësaj kohe autoritetet komunale refuzuan të përgjijgjen në pyetjet e Portalb.mk. Për këtë pyetëm ministrin e Mjedisit, se pse nuk intervenojnë për të ndihmuar Tetovën në këtë proces, Nuredini për Portalb.mk tha se ky është një problem i gjithë shtetit e jo vetëm i Tetovës, por kjo do të rregullohet në periudhën e ardhshme me funksionimin e deponisë Rusino.

Bazuar në faktin se Tetova është një ndër vendbanimet në të cilën është më e theksuar problematika me mbeturinat pyetëm ministrin e Mjedisit dhe Planifikimit Hapësinor, Naser Nuredinin se pse ministria nuk intervenon për ta ndihmuar Tetovën në tejkalimin e kësaj problematike. Nuredini për Portalb.mk tha se kjo është një problematikë në të gjithë shtetin dhe jo vetëm në Tetovë.

Gazetari i Portalb: Mirëpo në Tetovë është më e theksuar.

Nuredini: Tash ju shpjegoj edhe ajo ku është, nuk është vetëm Tetova. Të koncentrohemi te gjithë rajoni i Pollogut. Ne kur do të krijojmë zgjidhje për mbeturinat në shtetin tonë kemi plan rajonal, domethënë nëse jemi duke biseduar për Tetovën, është pjesa e Pollogut ku Rusino është tash për tash deponia e rajonit.
⁠
Ai shtoi se janë duke investuar bashkë me shtetin zviceran ku i janë falënderues programit SEKO për 1.9 milion frangat zvicerane.

“Rehabilitimi i deponisë është duke përfunduar tash edhe pak, fillimi janë shkallët e para ku rregullohet rruga, asfaltimi deri në deponi, peshorja do të vendoset atje dhe ujërat e zeza të mbyllen atje që mos e ndotin rajonin atje. Pastaj do të ketë një pranim dorëzim nga ndërmarrja e Komunës së Gostivarit në ndërmarrjen rajonale që është formuar, ato do të menaxhojnë deponinë dhe të gjithë nëntë komunat në rajonin e Pollogut do ti hedhin mbeturinat atje”, tha Nuredini.
⁠
Ministri tha se në të njëjtën kohë janë Kuvend në proces me gjashtë ligje të reja për zgjedhjen e problematikës së mbeturinave, ku do të përkrahim selektimin e mbeturinave që mos të përfundojnë në deponi të ndryshme në shtetin tonë.

“Me këtë zgjidhje edhe Tetova do të pjesë e asaj zgjidhjes. Në të njëjtën kohë kemi përkrahje shtesë nga shteti zviceran, kemi edhe një grant tjetër gjashtë milion franga na ofrojnë ata për zhvillimin e sistemit të menaxhimit rajonal. Plus jemi në procesin të marrim një huazim të ri nga BERZH-i 55 milion euro, presim edhe ata të na konfirmojnë atë huazim nga të cilat 17,8 besoj do të investohen në rajonin e Pollogut për rehabilitimin e deponisë Rusino, kamiona të rinj, transfostaciona në komuna të ndryshme dhe kontejnerë për çdo komunë. Kjo është në proces, normalisht nuk ndodh sot nga nesër por në kohën e ardhshme do ta rregullojmë”, tha Nuredini.

Mbeturinat kanë qenë dhe vazhdojnë të mbeten një ndër problemet kryesore për qytetin e Tetovës për shumë vite me radhë. Përgjegjës për menaxhimin e këtyre mbeturinave është Ndërmarrja Publike Komunale (NPK), e cila ndër vite akoma nuk ka gjetur një zgjidhje për këtë problem. Duke pasur parasysh se mbeturinat në koshat e plehrave nuk mblidhen mjaftueshëm dhe orari i mbledhjes së tyre nuk është i mjaftueshëm, dhe përderisa autoritetet kompetente nuk janë serioze dhe të gjejnë një zgjidhje më efikase për këtë problem, qytetarët po vazhdojnë të ngulfaten në erë të keqe.