Sot, shteti lëshoi emetimin e njëzetë të fletë-obligacioneve për denacionalizim në vlerë të përgjithshme prej 8 milionë euro, me të cilën do të kompensohen të gjitha aktvendimet e plotfuqishme për denacionalizim nga data 01.01.2020 deri më datë 31.12.2020, ku përcaktohet kompensimi që të bëhet përmes fletë-obligacioneve, njoftoi Ministria e Financave, transmeton Portalb.mk.
Mjetet që janë ndarë përmes fletë-obligacioneve, shteti do t’i paguajë me këste dhjetëvjeçare me normë interesi në nivel vjetor prej 2%.
Republika e Maqedonisë së Veriut në çdo kohë mund të bëj blerje të fletë-obligacioneve për denacionalizim para afatit të maturimit të tyre sipas kushteve, mënyrës dhe procedurës së përcaktuar nga Qeveria e Republikës së Maqedonisë së Veriut.
Tregtimi me fletëobligacione për denacionalizim do të bëhet në Bursën e Maqedonisë SHA Shkup, me ndërmjetësimin e shtëpive të brokerimit dhe bankave anëtare të Bursës së Maqedonisë.
Para afatit të maturimit të tyre, qytetarët mund t’i shfrytëzojnë fletëobligacionet për denacionalizim për pagesë të banesave në pronësi shoqërore.