Trajneri i Mançester United, Aleks Ferguson, është shprehur i lumtur pas barazimit 1:1 me Real Madridin në “Santiago Bernabeu”. Profesori e ka shprehur edhe njëherë veten si një tifoz i flaktë i Ronaldos.
“Jam i lumtur se kemi shënuar gol. Ai gol i Wolelbeck është shumë i vlefshëm. Ne arritëm ta ruajmë portën tonë në shumë situata të pakëndshme, prandaj nuk kam se si të mos jem i lumtur”, ka thënë Ferguson.
“Në pjesën e parë ishim plotësisht të shtrydhur. U kthyem thuajse të gjithë deri te De Hea, prandaj nuk është çudi që Reali çdo pesë minuta kishte raste të mira. Në vazhdim të ndeshjes u përmirësuam, arritëm të dalim përpara dhe mbrojtja jonë nuk ishte më brenda 16 metërshit. Gjithsesi, kjo ishte një ndeshje shumë intensive, ku edhe ne kishim rastet tona, sidomos në pjesën e dytë, kur luajtëm shumë më mirë sesa në pjesën e parë.Na pret një ndeshje mjaft interesante në ‘Old Trafford’ dhe gjithçka mbetet e hapur”.
Ferguson nuk harroi ta lavdërojë ish-yllin e skuadrës së tij, Kristiano Ronaldo, i cili nuk e festoi golin në shenjë respekti për “Djajtë e Kuq”.
“Fola me Kristianon pas ndeshjes, pasi erdhi në dhomat e zhveshjes dhe u ul për të biseduar me djemtë tanë. Ai ka kaluar 6 vite me ne dhe jam shumë krenar se sa është përmirësuar. Unë fillimisht fajësova Evrën që nuk u përpoq të ndalte gjuajtjen e tij me kokë, por pastaj pashë përsëritjen e atij rasti në TV dhe mu duk vetja pak i çmendur. Gjuri i Kristianos ishte thuajse aq lart sa koka e Evrës, diçka fenomenale. Nuk mendoj se ndonjë lojtar tjetër në botë mund ta bëjë një gjë të tillë, me siguri jo Mesi”, ka nënvizuar trajneri skocez.