Pas shumë seancave të shtyra, sot në Gjykatën Penale përfundimisht filloi procesi për rastin “I fuqishmi”, në të cilin mes të akuzuarve është deputeti nga VMRO-DPMNE, Antonio Miloshoski, transmeton Portalb.mk.
Rasti ka të bëjë me shitjen e një prone (ndërtesë prej 157 metra katrorë dhe një oborr prej 3,920 metrash katrorë) në fshatin Izishtë, e cila ishte në pronësi të Komunës së Makedonski Brodit, ndërsa e ka përdorur Komuna e Plëasnicës. Prona i ishte shitur babait të deputetit në fjalë. Dëmi që i është shkaktuar Komunës së Makedonski Brodit dhe buxhetit shtetëror, sipas prokurorisë, është rreth 50.000 euro.
Të gjithë të akuzuarit, Milosh Miloshoski, babai i deputetit (i akuzuari i parë), ish-kryetari i Komunës së Makedonski Brodit, Millosim Vojneski (i akuzuari i dytë), deputeti Antonio Miloshoski (i akuzuari i tretë) dhe të tjerët, Tomë Axhiev, Janake Vitanovski, Novica Veljanovski, Gjorgji Milloshevski, Shpend Vica, Agim Mehmeti dhe Daut Dauti deklaruan se nuk i pranojnë akuzat kundër tyre dhe nuk ndihen fajtorë për veprat penale që iu ngarkohen.
Shpjegim më të hollësishëm kishte njëri prej të akuzuarve, Shpend Vinca, i cili deklaroi se është përpjekur të kuptonte aktakuzën, gjegjësisht lidhjen e tij me persona të cilët, siç tha ai, as nuk i dinte, as nuk i ka parë dhe as ka bisedur me to.
“Nëse ka biseda të përgjuara, le t’i paraqesin dhe unë do t’i pranoj. Si mund të ndikojë një person tek unë kur e shoh për herë të parë në sallën e gjyqit. Tërësisht e hedh poshtë propozimin e prokurorisë dhe nuk ndihem fajtor” tha i akuzuari Vinca në shprehjen e (pa)fajësisë.
Rastin e udhëheq gjyqtarja Lenka Davitkova, ndërsa përfaqësues të aktakuzës janë prokurorët publik Fatime Fetai dhe Gavril Bubevski.
Dy nga të pandehurit akuzohen për kryerjen e Mashtrimit, dhe i akuzuari i tretë Miloshoski për Mashtrim dhe Shpërdorim të pozitës zyrtare dhe autoritetit sipas nenit 353 paragrafi 2 të Kodit penal, ku dënimi minimal është 5 vjet burg. Propozimi i Prokurorisë përfshin 10 personat e akuzuar për kryerjen e një vepre penale – Keqpërdorim i pozitës zyrtare dhe autoritetit sipas nenit 353 paragrafi 2.
Prokuroria Themelore Publike -Shkup në gusht të këtij viti ngriti aktakuzë për rastin “I fuqishmi”.
Këtë rast fillimisht e hapi Prokuroria Speciale në mars të 2018-ës. Më pas e mori përsipër Prokuroria Publike ndërsa prokurorja Fatime Fetai vazhdoi të punojë në këtë rast.
PSP-ja gjatë publikimit të rastit deklaroi se Milloshoski, nga pozicioni i tij politik, ka mundësuar shitjen e pronave shtetërore me çmime të ulëta. Në vitin 2011, ai dyshohet se ka arritur ta hetojë këshillin e komunës së Pllasnicës për të tjetërsuar një kooperativë, ndërsa dëmi vlerësohet rreth 50 mijë euro.
Seanca e radhës është caktuar më 23 prill.
- LEXO: Filloi gjykimi kundër Milloshkoskit dhe babait të tij, për shitjen e paligjshme të një ndërtese në Komunën e Makedonski Brodit
- LEXO: Rasti “I fuqishmi”, Prokuroria ngriti akuzë kundër Milloshoskit dhe 12 personave të tjerë
- LEXO: PSP ka hapur hetim kundër Milloshoskit për shitje jo-ligjore të një objekti në Makedonski Brod