Prokuroria Publike në Gostivar kërkoi paraburgim për nënën e fëmijës që vdiq dje në zjarr
Prokuroria Themelore Publike në Gostivar njoftoi se është lëshuar një urdhër për kryerjen e procedurës hetimore ndaj një personi, për të cilin ekziston dyshimi i arsyeshëm se ai ka kryer një krim – shkelje të detyrimeve familjare, i cili parashikohet dhe dënohet sipas nenit 203 paragrafi 2, në lidhje me paragrafin 1 të Kodit Penal.
Prokurori Publik i dorëzoi gjyqtarit të procedurës paraprake nga Gjykata Themelore në Gostivar, një propozim për përcaktimin e masës së paraburgimit për të dyshuarën 36 vjeçare. Krimi dënohet me burgim të paktën pesë vjet, përcjell Portalb.mk.
“Gjatë vitit 2021, e dyshuara, me një shkelje të rëndë të detyrimeve të saj ligjore familjare, abuzoi me fëmijën e saj 7 vjeç, të cilin e lidhi me një zinxhir dhe dry në shtrat. Më 16 mars, një zjarr shpërtheu në apartamentin ku po qëndronte familja, dhe për shkak se ishte i lidhur në shtrat, fëmija nuk arriti të dilte nga shtëpia dhe humbi jetën,” thuhet në deklaratën e Prokurorisë Publike Gostivar.
Shkaqet e zjarrit ende janë duke u përcaktuar, dhe fëmijët e tjerë të mitur të të dyshuarit janë marrë nën kujdesje të Qendrës për Punë Sociale në Gostivar, informoi zyra e prokurorit.
