MPJ-ja e Bullgarisë: Vetoja e Çekisë dhe Sllovakisë dëmton kredibilitetin e BE-së

T. B. 13:27, 18-12-2020

Ministria e Jashtme e Bullgarisë ka reaguar pasi, Çekia dhe Sllovakia nuk janë pajtuar që të miratohen konkludimet e BE-së për zgjerim.

“Bullgarisë i vjen keq që konkludimet e Këshillit të BE-së për procesin e asociacionit dhe stabilizimit u bllokuan papritur nga dy vende anëtare pa arsye gjatë këshillit për ambient jetësor të BE-së. Jemi të gatshëm të dëgjojmë shqetësimin që ka sjellë këtë vendim dhe t’i vazhdojmë përpjekjet tona për arritje të konsensusit për zgjerim”, kumtoi Ministria e Jashtme e Bullgarisë, transmeton Portalb.mk.

Nga kjo ministri, me të cilën udhëheq ministrja, Ekaterina Zaharieva, thanë se vetoja ndaj kokludimeve të Këshillit “rrezikon minimin e besimit në BE dhe të pengojë BE-në t’i dërgojë Ballkanit Perëndimor sinjalet shumë të nevojshme për stimulimin e reformave të domosdoshme që duhet t’i ndërmarrin vendet që dëshirojnë të anëtarësohen dhe kërkon që Këshilli të mundësoj miratimin e konkludimeve gjatë presidencës gjermane me Këshillin e BE-së, e cila përfundon më 31 dhjetor.

Në tekstin përfundimtar të konkludimeve, me kërkesë të Bullgarisë u vendos fraza “interpretim i gabuar i historisë”, por Çekia dhe Sllovakia vlerësojnë se ajo është e dëmshme dhe do të shkaktojë komplikime. “Nuk do të lejojmë që Bashkimi Evropian të jetë gjykatës i historisë sonë të përbashkët, si identifikohemi apo në çfarë gjuhe flasim”, thanë në deklaratë të përbashkët ministrat e Jashtëm të Çekisë dhe Sllovakisë, Tomash Petriçek dhe Ivan Korçok.

“Bullgaria miratoi konkludimet e Këshillit gjatë kohës së mbledhjes së COREPER II më 16 dhjetor, me çka presidenca gjermane arriti konsensus. Me insistim të Bullgarisë, në konkludimet u shtua fjalia për rëndësinë e marrëveshjeve të Republikës së Maqedonisë së Veriut me Bullgarinë dhe Greqinë dhe se zbatimi i tyre do t’i jep fund të gjitha pretendimeve të interpretimit të gabuar të historisë. Gjatë kohës së mbledhjes, konkludimet u miratuan nga të gjithë”, thanë nga MPJ-ja bullgare.

Prej aty kanë sqaruar se konkludimet e Këshillit për zgjerim të BE-së nuk kanë asnjë lidhje me procesin e miratimin të kornizës negociuese të Shqipërisë dhe Maqedonisë.

Republika Çeke dhe Sllovakia kanë përshëndetur përpjekjet e Gjermanisë në zgjerimin e BE-së, megjithatë, përmes një kumtese të dërguar dje, informuN se nuk mund të pranojnë me propozimet e Gjermanisë. Si problem kryesor e kanë fjalinë “keqinterpretim i historisë”. Këta shtete në një kumtesë të përbashkët shprehen se nuk do të lejojnë që BE-ja të gjykoje dikë për historinë, mënyrën si identifikohen ata dhe gjuhën që e përdorin

Ata këtë kumtesë e përfunduan duke thënë se ndjehen “jashtëzakonisht të zhgënjyera që kornizat negociuese të Maqedonisë së Veriut dhe Shqipërisë nuk janë miratuar”.

Kujtojmë se, Maqedonia e Veriut dhe Bullgaria kanë tensionuar raportet muajve të fundit, për shkak të kontesteve historike. Sofja zyrtare kërkon që Shkupi t’i pranojë kërkesat bullgare se gjuha maqedonase është normë e asaj bullgare dhe se kombi maqedonas është krijuar nga Tito. Paraprakisht, në një dokument gjashtë faqe, me arsyetime të gjata historike për “ideologji shtetërore antibullgare” në Maqedoninë e Veriut, Bullgaria u dërgoi memorandum sqarues vendeve anëtare të BE-së në prag të vendimit për fillimin e negociatave me Unionin.

Ky kontest ka bllokuar procesin eurointegrues të vendit, me çka Bullgaria i vendosi dy here veto Maqedonisë së Veriut, një herë në këshillin e ministave të Jashtëm të BE-së si dhe në Këshillin për Punë të Përgjithshme të BE-së, duke penguar në këtë mënyrë miratimin e kornizës negociuese për fillimin e negociatave të vendit me BE-në. Për zgjidhjen e kontesteve të historisë, komisioni maqedono – bullgar ka mbajtur takime, po nuk kanë arritur të gjejnë zgjidhje. Palët kanë mosmarrëveshje më së shumti rreth identitetit të figurave historike të Mbretit Samoil dhe Goce Delçevit.