Qeveria e Maqedonisë së Veriut vlerësoi se gjithë vendet anëtare të Bashkimit Evropian, sikurse Bullgaria, konfirmuan se RMV-ja i përmbush kushtet për anëtarësim, përkundër asaj se bllokohet nga Bullgaria, transmeton Portalb.mk.
“Identiteti kombëtar maqedonas nuk ishte, nuk është dhe është e pamundur të jetë çështje e negociatave. Populli maqedonas dhe gjuha maqedonase janë shtyllat e identitetit maqedonas. Ato vijnë nga e kaluara, dhe njëkohësisht janë shtyllat e të ardhmes tonë evropiane”, vlerësojnë nga Qeveria.
Qeveria theksoi se asnjëherë nuk do të dorëzohen nga e drejta e vetëvendosjes së qytetarëve maqedonas.
“Fatkeqësisht, procesin për zgjerim, si qëllim strategjik i BE-së, e ndërpreu Republika e Bullgarisë si anëtare e BE-së. Bëhet fjalë për papërgjegjshmëri dhe gabim të rëndë gjeostrategjik”, vlerësuan nga Qeveria.
Qeveria përkujtoi se Këshilli i BE-së në muajin mars dha dritë jeshile për nisjen e negociatave me RMV-në, kur gjithë vendet u pajtuan, duke përfshirë edhe Bullgarinë.
“Për ne nuk ka rrugë tjetër, nuk ka alternative tjetër. E ardhmja maqedonase është evropiane”, theksuan nga Qeveria.